Menu

Meclis, Türkiyedeki zelzeleden zarar körgenlerge gumanitar yardım yolladı (FOTO)

10 Mart 2023
Meclis, Türkiyedeki zelzeleden zarar körgenlerge gumanitar yardım yolladı (FOTO)

Zarar körgen Türkiye vatandaşları içün ASTEM Foundatıon ile birlikte Meclisniñ gumanitar meseleler idare merkeziniñ göñüllileri, yüzlerce issi yorğan, yastıq, taşıyıcı yataq ve yataqlı çuval, urba ve azıq mahsulatını topladılar.

Hatırlatamız ki, kiçik aynıñ 6-sında Türkiyeniñ cenübiy şarqısında ve Suriyeniñ toprağında ciddiy zelzele oldı. O neticesinde tahminen 45 biñ kişi elâk oldı.

O zaman Qırımtatar Milliy Meclisi, Türkiyege gumanitar yardım bermek içün “Yahşı qomşu – eñ yaqın aile” umumiyukrain tedbirini keçirmege teşebbüs etti.

– Çoq insan fevqulâde vaziyettedir. Bütün dünya, umumen 105 devlet ve halqara teşkilât Türkiyege yardım bermege birleşti. Ve elbette Ukraina, qomşu olaraq ve biz, qırımtatarlarımız, ağa haqlı olaraq, yardım etmek içün ellerimizden kelgenni yaptıq. Elbette biz o qadar çoq para toplamadıq, amma tamla-tamla ile göl olır dep aytalar. Yarım ay evel İstanbulda körüştik. Para toplap, anda gumanitar yardım aldıq. O zaman çoq devlet erbabı ketip, zor vaqıtlarda yardımımız içün teşekkür bildirdi. Yani bu qara künlerde yardım elimizni uzatmağa tırıştılar. Tek qırımtatarlar degil, em ukrainalılar, em azerbaycanlar, em de başqa halqlar bu gumanitar yardım toplamağa qatıldılar. Umumen 65 biñ dollar toplandı, – dep qırımtatar halqınıñ lideri Mustafa Cemilev añlattı.

Türkiye elçiligi, berilgen yardımnıñ logistikasını al etti. Ukrainadaki Türkiye Cumhuriyetiniñ Fevqulâde ve Salâhiyetli Elçisi Yağmur Güldere ukrainalılar, qırımtatarlar ve tarafta turmağa qalmağan kişilerge felâketniñ ilk künlerinden berli para, gumanitar yardım ve atta qurtarıcı aletlerni toplamağa qatılmaları içün teşekkür bildirdi. Böylece, FVDHniñ qurtarıcı taqımı 2 uçaq, 17 araç ve 90 işçisini Türkiyege yolladı.

– Biz Ukrainağa ve ukrain halqına minnetdarılığımıznı bildiremiz. Zor vaqıtlarda bizni qol tuttıñız. Ayrıca quvandıq ki, dost olğan qırımtatar halqı qatılıp, bizge yardım etti, suvuq vaqıtlarda bizni isitti. Zelzeleden evel biz çoq işdeşlik yaptıq ve qırımtatarlarnen işdeşlik yapmağa devam etemiz. Biz para toplamaq içün esap açqanda yırcı Jamala 60 biñden ziyade dollar toplamağa yardımcı oldı. Acımız büyüktir. Amma dostlarımız ile birlikte yaralarımıznı şifalaycaqmız, – dep Türkiye elçisi ayttı.

Keçenlerde Meclisniñ gumanitar meseleler idare merkezi, naqliyat şirketleri vastasınen yüzlerce kilogramlı yardım yolladı. Şimdi ise beklenilir ki, elçilikniñ yardımınen bu yük Türkiyege yollanacaq ve “Yahşı qomşu – eñ yaqın aile” tedbiriniñ faal fazası başlaycaq, amma kampaniya devam etecek.

– O zaman zelzeleniñ fevqulâde neticelerini añlamay edik. Endi doquz senedir rusiyenen cenk vaziyetinden bulunğan Ukrainada biz büyük yardımğa işanmadıq, amma miqdar meselesi degil, ukrain cemaatınıñ da qomşuda olğan felâketke qarşılıq köstermesi müimdir. Çoq taraf ses berdi: em devler organları, em oquv yurtları, em şahsiy biznes. Men tüşünem ki, biz kampaniyanı bu faal fazada bitiremiz, amma içtimaiy ağlarda beyanatımız bar. Bunıñ içün biznen beraber bu saada işdeşlik yapmağa istegenller olsalar, esaplar yayınlandı, bizim insanlarımız çalışmağa devam eteler, Meslisniñ idare merkezi yardım berüv işini devam eteler, – dep Refat Çubarov añlattı.