Ukrayina Devlet Bayrağı Künüñiz hayırlı olsun!

23.08.2026

Ürmetli vatandaşlar!

Ürmetli dostlar!

Arman ayınıñ 23-nde mustaqil Ukrayinanıñ eñ müim timsallerinden biri olğan Ukrayina Devlet Bayrağını ğurur ve teren ürmetnen añamız.

Epimiz içün renkleri sıñırsız tınç kök ve bereketli ukrayin topraqlarınıñ altını olğan Ukrayina Devlet Bayrağı ukrayin milletiniñ qırılmazlığı, azatlıqqa ıntıluvı, milliy itibarı ve devlet mustaqilliginiñ timsalidir.

Ukrayina Devlet Bayrağınıñ teren timsali onı qırımtatar milliy bayrağınen birleştire. Qırımtatar bayrağınıñ mavı tüsü de temiz kök, barışıq, namus ve temiz fikirlerniñ timsali ola. Ve altın tamğa – Ukrayina bayrağındaki boğday tarlasınıñ altını kibi – toprağımıznıñ zenginligini ve maneviy mirasını, nesillerniñ devamlığını ve milliy ananelerniñ deñişmezligini aks ete. Bugün bu renkler bizim qardaşlığımıznıñ, ortaq tarihiy taqdirimizniñ ve öz toprağımızda serbest yaşamağa ıntılğanımıznıñ umumiy timsali oldı.

Ukrayina Devlet Bayrağı, mustaqil Ukrayina devletini yoq etmek, halqını esir etmek ve öz kelecegini serbest belgilemek aqqımızdan marum etmek niyetinen toprağımızğa istilâ etken Rusiye istilâcısına qarşı umumiy küreşte devletimizniñ bütün vatandaşlarını, etnik tamırları ya da dinine baqmadan, toplay ve birleştire.

Asırlar devamında Ukrayina devletiniñ serbestligi ve mustaqilligi içün küreşken bütün askerler nesillerine minnetdarlığımıznı bildiremiz. Bugün, on eki yıldan ziyade devam etken Rusiye-Ukrayina cenki vaqtında olğanı kibi, devletimizniñ topraq bütünligi, suvereniteti ve mustaqilligini qorçalağan Ukrayina qorçalayıcılarına baş egemiz. Ukrayina Qaramanlarınıñ hatırasını anmaq içün başımıznı egemiz

Ukrayina Devlet Bayrağı Kününe vaqtınca işğal etilgen Qırım ve Rusiye tarafından zapt etilgen diger ukrayin topraqlarınıñ repressiyalar, taqip ve işğal rejimleriniñ daimiy basqısına baqmadan, Rusiye işğaline razı olmağan bütün sakinlerine birdemlik bildiremiz. Olarnıñ sabırlılığı, Ukrayina Bayrağı azat etilgen er bir şeer ve köyniñ üstünde tekrar köterilip, Vatanımızğa azatlıq, barışıq ve adaletni qaytarğan kününi yaqınlaştıra.

Qırımtatar Milliy Meclisi adından er kesni Ukrayina Devlet Bayrağı Kününen hayırlaymız!

Ukrayinağa şan-şerefler

Refat Çubarov
Qırımtatar Milliy Meclisiniñ Reisi

Kıyiv ş.
2026 senesi arman ayınıñ 23-ü