Qırımtatar Milliy Meclisiniñ toplağanı gumanitar yardım, Türkiye AFADğa yollandı

27 Fevral 2023

2023 senesi kiçik aynıñ 6-sında Türkiyeniñ cenübiy ve merkeziy topraqlarında ciddiy viraneler ve insan ğayıplarınıñ neticesi olğan şiddetli bir zelzele oldı.

Bunıñ içün Qırımtatar Milliy Meclisi, “Yahşı qomşu – eñ yaqın qoranta” umumiy ukrain tedbirini keçirmege teşebbüs etti. Bu tedbir, 2023 senesi kiçik aynıñ 6-sında viran etici zelzelelerden zarar körgen Türkiye vatandaşlarına gumanitar yardımğa yöneldi. 

– Meclis, bu teşebbüs çerçivesinde toplanğan yorğanlar, bala aşı, urba, çadırlar ve sobalar kibi ilk kerekli eşyalarnı Pendik Belediyesiniñ Kurtköy sport zalına ketirdi. AFADğa berilgen gumanitar yardım, yaqın kelecekte zelzele zonasına yollanacaq, – dep Qırım haber agentligi haber berdi.

Toplanğan yardımnı ketirüv ceryanında qırımtatar milliy lideri, Ukraina halq mebusı Mustafa Cemilev, Ukrainanıñ arap ve musulman devletlerinen işdeşlik meseleleri mesleat şurasınıñ kâtibi Snaver Seithalil ve Qırım Milliy Varlıq Fondunıñ prezidenti Lenur Mambetov iştirak ettiler.

– Bir sene evel Rusiye büyük bir ücüm yaptı. Türkiye, cenkniñ başlanğıcından berli yanımızda oldı. Eger Türkiyeniñ destegi olmasa edi, Ukraina ayrıca ilk künler çoq ağır bir vaizyette qalacaqtı. Bunı ukrain halqı iç bir zaman unutmaycaq. Şimdi Türkiyeniñ başına böyle bir belâ kelgeni zamanda er kes öz maneviy borcunı elinden kelgenni yaparaq ödey. Türkiyeniñ yanında olacaqmız. Elimizden kelgenni yapacaqmız, – dep qırımtatar halqınıñ lideri Mustafa Cemilev qayd etti.