Menu

Qırımda işğalciler mobilizatsiya malümatnamelerini bermege devam eteler – CrimeaSOS

27 Sentâbr 2022
Qırımda işğalciler mobilizatsiya malümatnamelerini bermege devam eteler – CrimeaSOS

İşğalciler yarımadada mobilizatsiyanıñ bitirilmesinen bağlı beyanatlarğa baqmadan, Qırımnıñ sakinlerine mobilizatsiya malümatnamelerini bermege devam eteler. CrimeaSOSnıñ analitikacısı Yevhen Yaroşenko bu aqqında haber berdi.

– Belli oldı ki, işğal müessiseleri Sudaqta ve Canköy rayonında mobilizatsiya malümatnamelerini bermege devam eteler. Böylece, Qırımdaki işğal memuriyetiniñ başı serhiy aksönovnıñ beyanatına baqmadan, işğalciler yarımadada böyle degen ‘qısmiy mobilizatsiya’nı keçirmege devam eteler, – dep Yevhen Yaroşenko añlattı.

Bazar künü sentâbr ayınıñ 25-inde Qırımnıñ böyle degen başı serhiy aksönov haber berdi ki, mobilizatsiya planı ‘tamamınen yerine ketirildi’. Keçenlerde o, Qırımda 10 biñ kişini mobilizatsiya etmek niyeti aqqında laf etti.

Sentâbr ayınıñ 21-inde rusiyede böyle degen ‘qısmiy mobilizatsiya’nı ilân ettiler. İlk kününde Qırımda arasında qadınlar olmaq üzre eñ az 500 kişige mobilizatsiya malümatnamelerini beridiler. Evelki esaplarğa köre, berilgen mobilizatsiya malümatnameleriniñ tahminen 90 %-ini qırımtatarlar aldı. Aynı zamanda qırımtatarlar yarımadanıñ ealisiniñ 13-15 %-ini teşkil ete. Mobilizatsiyanıñ bu tür miqyası qırımtatar halqınıñ gizli genotsidiniñ sebebi ola bilir.