Eñ qıyın vazife – insanğa bu akimiyetten adaletni beklemege kereksiz olğanını añlatmaq – Celâlnıñ mektübi

20 Sentâbr 2022

‘Bombanı saqlama’ ve ‘silâlı teşkilâtlarda iştirak’ – işğal etilgen Qırımda Ukraina vatandaşlarına qarşı eñ rağbetli maddelerdir. Epishaneden Meclisniñ ilk muavini, siyasiy mabüsi Nariman Celâl öz mekübinde bunı yazdı. Advokatı Mıkola Polozov Facebookta mezküz mektüpni yayınladı.

Siyasiy mabüs epishanede tanış olğanı insanlarnıñ ikâyelerini añlattı ve haberdar etti ki, Telükesizlik Federal Hızmeti böyle degen ‘terrorcılar’nıñ cedvelini kenişletmege devam ete, Canköydeki tintüvlerden soñ olarnıñ soñ taqımı taqiqatçı izolâtorında adaptirlene. Celâl qayd etti ki, olarnıñ ikâyelerini diñlemek pek qıyın.

– O qadar çoq adaletsizlik, şiddetlik ve qanunsızlıq bar. Delil temeli ya mevcut olmay, ya da manasız ve boştur. Faqat üçlük – taqiqat, prokurorlıq, makeme – uzun senelerge insanlarnı esaretke yollamağa devam ete. Misal içün kamera keçken qomçu Maksim kibi şahıslar şartlı ceza alğanda (boş şey içün) bu bir mücize olaraq körüne, – Celâl yazdı.

Ve itiraf etti ki, absolüt ve şiddetli adaletsizlik sebebinden esir etilgen insannıñ ruhiy alını nezaret etmek zordur. Er kes degil, atta çoqusı da bu tür telüke añlamay ve oña azır olmay edi. Atta aqıllı insanlar da bu tecribe zor bir şekilde başlarından keçireler. Bunıñ içün olarnı destek etmege, imkânı ve fırsatı olsa, olarnen tanışmağa ve laf etmege tırışa, yazıp Celâl berdi.

– Eñ qıyın vazife – insanğa bu akimiyetniñ eñ kiçik adalet adımını beklemege kereksiz olğanını añlatmaq. Mında o mevcut olmay. Hatta adiy cinaiy maddeler içün. Amma ümütni yoq etmemek kerek, – yazıp siyasiy mebüs añlattı.