Qırımtatar Milliy Meclisiniñ Ukrainadaki İspaniya elçisinen körüşüvi

09 Mayıs 2023

2023 senesi mayıs ayınıñ 8-inde Kıyivde Ukrainadaki İspaniya Qırallığınıñ Salâhiyetli ve Vekâletli elçisi Rikardo Lopes-Aranda HAGU (Ricardo Lopez-Aranda Jagu) ve Ukrainadaki İspaniya Elçiliginiñ konsulı Hose Losano HAYARDO (Jose Lozano Gallardo) ile Qırımtatar Milliy Meclisiniñ Başı Refat ÇUBAROV, Qırımtatar Milliy Meclisiniñ azaları Eskender BARİİEV ve Riza ŞEVKİEVniñ körüşüvi keçirildi.

Planlaştırılğan vaqıttan çoq devam etken körüşüvde iştirakçikeri çoq mesele muzakere ettiler. Olar, em rfnıñ işğal etilgen Qırımda insan aqları ve tamır qırımtatar halqınıñ vaziyeti, em de Qırım yarımadasını işğalden azat etüv ve reintegratsiya etüv ceryanında al etilecek meseleler.

Refat ÇUBAROV, Eskender BARİİEV ve Riza ŞEVKİEV Qırımtatar Milliy Meclisiniñ Ukraina qanunlarına mücibi azat etilecek Qırımnı yañıdan idare etüv, Qırımnıñ sakinleriniñ mülk ve başqa qanuniy aqlarını qorçalav, qanunsız areketler yapqan insanlarnıñ mesüliyeti, rusiye Qırımnı işğal etken soñ anda yerleşken ecnebiy ve vatandaşlıqsız insanlarnı çıqaruv meselelerinde nazar noqtasını tafsilâtlıca añlattılar.

Aynı zamanda iştirakçiler, cenkten soñki Ukrainada Qırımnıñ uquqiy statusına dair meselege çoq vaqıt ayırdılar.

Belli olğanı kibi, Qırımtatar Milliy Meclisi, qırımtatar halqınıñ tek menfaatını muntazam tarzda qorçalay. Qırım yarımadası – Ukrainanıñ ayırılmağan qısmıdır, onıñ toprağında teşkil etilgen Qırım Muhtar Cumhuriyeti ve Aqyar şeerini Ukraina Qanunnamesinde tesbit etilgen vekâletlerini yapacaq milliy-topraq muhtariyetine deñiştirmek kerek.

Qırımtatar Milliy Meclisiniñ azaları eminligini bildirdiler ki, İspaniyanıñ muvafaqiyetli tecribesi, topraqlarında farqlı halqlarnı ve olarnıñ unikal medeniyetlerini ve tillerini qorumaq maqsadınen teşkil etilgen muhtariyetlerniñ bulunğanları Avropa Birliginiñ azası olğan başqa ülkeleriniñki kibi, bazı ukrain siyasetçilerine mustaqil bir ülkeniñ terkibinde muhtariyetlerniñ rolü ve yeri aqqında stereotiplerini yoq etmege yardım etecek.

Körüşüvniñ soñunda taraflar, Ukraina ve İspaniya arasında dostane munasebetler çerçivesinde işdeşlik yapmağa ve muntazam tarzda bilgilernen paylaşmağa añlaştılar.

Qırımtatar Milliy Meclisiniñ matbuat hızmeti