Menu

Zor ruhiy alda, qorqutulğan – işğalciler Qırımğa 2 biñ hırsızlanğan ukrain balasını ketirdiler

20 Oktâbr 2022
Zor ruhiy alda, qorqutulğan – işğalciler Qırımğa 2 biñ hırsızlanğan ukrain balasını ketirdiler

İşğalciler vaqtınca işğal etilgen Herson ve Zaporijjâ şeerlerinden Qırımğa 6-18 yaşındaki 1939 balanı qış urbasız ve ayaqqabısız ketirdiler, dep Qırımtatar Maaliy Merkezi haber berdi.

Şimdi balalar Kezlev şeerinde bulunalar. Olarnıñ çoqusı öksüz olmay, yani olarnıñ Ukrainanıñ qıtaviy qısmında ana-babaları bar.

QMMniñ bilgilerine köre, şu anda balalar zor ruhiy alda bulunalar, olar qorqutıldı, bir-birinen qavğalaşalar Oktâbr ayınıñ 24-ünden işğalciler balalarnı mektepke yollamağa planlaştıralar, yani olarnıñ evlerine qaytmaları aqqında laf olmay.

– Mevcut malümatqa köre, qırım mektepleriniñ müdirleri haberdar oldılar ki, balalarnı telükeden saqlamaq, telükesiz alğa ketirmek maqsadınen ve memuriyetniñ qararınen ana-babalarınıñ iznini almadan balalar zornen tahliye etildi. Bunıñ içün işğal etilgen Qırımdaki ana-babalarnı balalarına diqqatnen baqmağa çağıramız, – dep QMM bildirdi.

Şu anda Qırımdaki müessiselerde ve mekteplerde işğalciler urba ve ayaqqabı toplamağa başladılar.

– Ruslar yañıdan insanlarnı aldatmağa ve qırımlılarğa köstermege tırışalar ki, olar balalarnı millitçilerden qurtaralar. Faqat kerçekten de bu balalarnı yaşağanları yerlerden ayırmağa mecbur ettiler ve bazılarını da öksüz qaldırdılar, – beyanatta yazıldı.