Paskalya bayramı hayırlı olsun!

12.04.2026

Ürmetli vatandaşlar!

Devletimiz içün müim olğan, Ukrayina devletiniñ, ukrayin ve qırımtatar halqlarınıñ kelecegi al etilecek bu devirde bizni serbestlik, menlik ve din kibi umumiy qıymetlerimiz birleştire. Paskalya bayramı, yarıqnıñ qaranlıqqa, aqiqatnıñ yañlışlıqqa qarşı ğalebesiniñ timsali ola, ve bugün bu teren manası er birimizniñ yüreginde seslendirile. 

Bizim umumiy areketlerimiz ve samimiy dualarımız bir maqsatqa – Ukrayinanıñ Ğalebesi, Qırımnıñ ve Rusiye zapt etkenleri tarafından işğal etilgen bütün ukrayin topraqlarınıñ azat etilmesi, em de insanlarnıñ tuvğan evlerine qaytmasına – doğrultılğan.

Ukrayina qoruyıcılarını, ellerinde silânı alıp, cesürliknen ve fedakârlıqnen toprağımıznı qorçalağanlarnı Paskalya bayramında ürmet ve minnetdarlıqnen hayırlaymız.

Paskalya bayramı er bir qorantağa barışıq, eyilik, ahlâq ve ruh sıcağı ketirsin, yürekler ise nur, ümüt ve yahşı kelecekke qaviy işançnen toldurılsın.

Qırımtatar Milliy Meclisi adından bu büyük bayramnı qayd etken ve onı ürmet etken bütün Ukryaina vatandaşlarını Paskalya bayramınen hayırlaymız!

Refat Çubarov

Qırımtatar Milliy Meclisiniñ Reisi

2026 senesi çiçek ayınıñ 12-si

Kıyiv ş.