Ukrayina Yuqarı Şurasını qırımtatar bayrağınen aydınlattılar

19.05.2026

Kıyivde Ukrayina Yuqarı Şurasınıñ binası yanında qırımtatar halqınıñ sürgünliginiñ 82 yıllığına bağışlanğan hatıra-timsal aktsiyası keçirildi. Küneş batqanda Ukrayina parlamentiniñ ögünde hatıra, birdemlik ve Qırımnı işğalden qurtaruv oğrunda küreşke qoltutuv timsali olaraq qırımtatar bayrağı aydınlatıldı.

Tedbirde qırımtatar halqınıñ lideri Mustafa Cemilev, Ukrayina Prezidentiniñ Qırım Muhtar Cumhuriyetindeki Daimiy Temsilcisi Olğa Kurışko, Ukrayina halq mebusı Tamila Taşeva, Qırımtatar Milliy Meclisiniñ vekilleri Refat Çubarov, Ahtem Çiygöz, Eskender Bariyev, Riza Şevkiyev ve Gülnara Bekirova, çetel diplomatik missiyalarnıñ vekilleri ve cemaat vekilleri iştirak ettiler.

Öz çıqışında Mustafa Cemilev qayd etti ki, Menlik İnqilâbından soñ Ukrayina tam mustaqillik kursını aldı ve tamır qırımtatar halqına qarşı tarihiy adaletni sistemli şekilde tiklemege başladı.

Onıñ qayd etkenine köre, Ukrayina tek 1944 senesi sürgünligini genotsid olaraq tanıp qalmadı, Qırımtatar Milliy Meclisini Qırım tamır halqınıñ temsiliy organı olaraq resmen tanıdı ve qırımtatarlarnıñ statusını Ukrayinanıñ tamır halqı olaraq belgiledi.

Mustafa Cemilev Latviya, Litvaniya, Estoniya, Kanada, Poloniya, Felemenk ve Çehiye Cumhuriyetiniñ parlamentlerine qırımtatar sürgünliginiñ genotsid olaraq resmen tanğanı içün minnetdarlığını bildirdi. Onıñ aytqanına köre, bu tek qırımtatar halqı içün degil de, bütün demokratik dünya içün kelecekte böyle cinayetlerniñ tekrarlanmasına yol bermemek içün müimdir.

Qırımtatar halqınıñ lideri şunı da qayd etti ki, qırımtatar bayrağınıñ parlament binasına qoyulması vaqtınca işğal etilgen Qırım içün küçlü bir signal ola – Ukrayina Qırımnı unutmağanını ve onıñ azat etilmesi içün küreş devam etkenini köstere.

Hatıra proyektsiyasına jurnalist ve cemaat erbabı Naciye Ametovanıñ sürgün etilgen qırımtatarlar aqqında şaatlıqları ve yırcı Üsein Bekirovnıñ muzıkası eşlik etti.

Aktsiya Qırımtatar halqınıñ genotsid fedalarını añma kününe umummilliy tedbirlerniñ bir qısmı ve qırımtatarlarnıñ aqları ve Qırımnıñ işğalden azat etilmesi içün devam etken küreşiniñ hatırlavı oldı.