Ukrayina Yuqarı Şurası dünyanı qırımtatar halqınıñ sürgünligini genotsid olaraq tanımağa ve rusiyege basqı quvetleştirmege çağırdı

14.05.2026

Ukrayina Yuqarı Şurası Ecnebiy ülkelerniñ ükümtleri ve parlamentlerine, halqara teşkilâtlarğa ve parlament assambleyalarına qırımtatar halqınıñ genotsid fedalarınıñ hatırasını añmaq ve Rusiye tarafından Ukrayinanıñ vaqtınca işğal etilgen topraqlarında aq ve serbestliklerniñ bozuluvına cevap bermek içün muracaat aqqında Qarar qabul etti.

Qarar halq mebuslarınıñ anayasa çoqluğı tarafından desteklendi: 272 mebus buña qol tuttı, biri bile ne “qarşı” çıqtı, ne de “bitaraf” qaldı.

Bu vesiqa 1944 senesi qırımtatar halqınıñ sürgünliginiñ 82 yıllığı arfesinde qabul etildi – bu, sovet totalitar rejiminiñ Qırım tamır halqına qarşı eñ şiddetli cinayetlerinden biri oldı.

Qırımtatar Milliy Meclisiniñ Reisi Refat Çubarov qayd etti ki, bu qarar tarihiy adaletniñ ğayrında tiklenmesinde ve qırımtatar halqınıñ aqlarınıñ qorçalanmasında müim bir adım ola.

“Bu qarar qırımtatar halqınıñ facial tarihına büyük ürmek aktı ve halqara ortaqlarğa açıq-aydın bir signal ola: Qırım ve insanları oğrunda küreş – adaletli dünya içün bizim küreşimizniñ ayırılmaz parçası ola”, – dep Refat Çubarov qayd etti.

Qarar halqara toplulıqlnı qırımtatar halqınıñ sürgünliginiñ genotsid aktı olaraq tanılmasına dair ğayretlerini faalleştirmege, Qırımnı ilhaq etmek ıntıluvlarını siyasiy ceetten tanımamağa devam etmege, qırımtatarlar ve işğal etilgen yarımadanıñ başqa sakinleriniñ taqip etilmesini takbih etmege, em de rusiye federatsiyasına diplomatik ve sanktsiya basqısını quvetleştirmege çağıra.

Bundan ğayrı, vesiqada halqara adalet mehanizmlerine qol tutumaq, ukrayin siyasiy mabüslerini ve qanunsız şekilde tutulğan vatandaşlarnı azat etmek kerekligi ve Ukrayinağa kelecek halqara destekniñ müimligi aqqında da söz yürsetile.

Bu qararnıñ teşebbüsçilerinden biri olğan Ukrayina halq mebusı Tamila Taşeva onı sessiya zalında taqidm etkende qayd etti ki, bugün rusiye federatsiyası bu müsemleke siyasetini devam ete, qırımtatarlarnıñ taqip etilmesi, Meclisniñ yasaq etilmesi ve insan aqlarınıñ bozuluvını kimligimizniñ yoq etilmesi içün qullana

Bugün Latviya, Litvaniya, Kanada, Poloniya, Estoniya, Çehiya Cumhuriyeti ve Felemenk parlamentleri Ukrayinanen birlikte 1944 senesi sürgünlikni genotsid olaraq tanıdı.