Meclis azası Gülnara Bekirova “UP 100. Qadınlarnıñ küçü 2026” reytingine kirdi

24.03.2026

Qırımtatar Milliy Meclisiniñ azası Gülnara Bekirova er yıl Ukrayinska pravdanıñ teşkil etkeni “UP 100. Qadınlarnıñ küçü 2026” reytingine kirdi. O, “Cemiyet” kategoriyasında ğalebe qazandı. “Cemiyet” kategoriyasında Qırımtatar resurs merkeziniñ idarecisi Zarema Barieva, “Medeniyet” kategoriyasında ise sanatkâr Aziza Eskender qayd etildi.

Mukâfatlandıruv merasimi 2026 senesi saban ayınıñ 24-nde olıp keçti ve zemaneviy Ukrayinanı havfsızlıq, cemaat sektorı, medeniyet, ilim, biznes ve halqara advokatlıq saalarında şekillendirgen qadınlarnı birleştirdi. Leyha, cenk vaqtında ve onıñ ğayrıdan qurulışında memleketniñ deñişmesinde qadınlarnıñ rolüni añlamaq içün müim bir meydançıq ola.

Bu sene teşebbüsniñ şiarı – “Biri çiçek açsa, epimiz çiçek açarmız” – ukrayin şairi ve dissident Vasıl Stusnıñ fikirlerine esaslana, o, “çiçek açması”nı eñ qıyın şaraitte bile içki serbestlik, menlik ve yarıqnıñ ifadesi olaraq añlay edi.

Qırımtatar Milliy Meclisiniñ matbuat hızmetine bergen izaatında Gülnara Bekirova, mukâfatnı tek şahsiy taqdirlev olaraq degil de, umumiy mukâfat olaraq qabul etkenini qayd etip, teşkilâtçılarğa teşekkür bildirdi:

“Menim içün bu tek bir mukâfat degil – bu büyük bir şeref ve mesuliyet. Er kün öz emegi, israrlığı ve inancınen memleketini deñiştirgen qadınlar arasında olmaq – ğayet qıymetli bir şey”.

Onıñ qayd etkenine köre, onıñ yolu – halq ve devletke hızmet etmektir, mukâfat ise insan aqları ve serbestlik oğrunda küreşni devam etken qırımtatar qadınlarına ait:

“Menim ikâyem –  tek şahsiy degil, qırımtatar halqınıñ sesi, adaleti, hatırası ve Qırımnıñ qaytarıluvı içün küreşi aqqında ikâyedir”.

O, Rusiye işğaline qarşılıq kösterüvde qadınlarnıñ rolüni ayrıca qayd etti:

“Qadınlar özleri qarşılıq timsali oldılar, işğalcige ukrayin ve qırımtatar qadınlarınıñ iradesini iç bir repressiya yıqıp olamaz, dep köstere ediler”.

Gülnara Bekirova siyasiy mabüslerniñ qorantalarına qol tutuvnıñ müimligini qayd etip, qırımtatar qadınları bugün halqara arenada Qırımnıñ sesi ve qanunsız şekilde apiske alınğanlarnıñ azat etilmesi içün küreşte faal quvet olğanını qayd etti.

Qırımtatar Milliy Meclisi namzetlerni taqdirlep, olarnıñ faaliyeti qırımtatar halqınıñ aqlarını qorçalav ve ukrayin cemiyetini pekitüv işinde müim isse olğanını qayd etti.