Ukrainanen meraqlanuv seviyesi artta – Bariiev Qırım platformasınıñ neticeleri aqqında
![Ukrainanen meraqlanuv seviyesi artta – Bariiev Qırım platformasınıñ neticeleri aqqında](https://qtmm.org/wp-content/uploads/2022/11/2037449836.png)
Qırım platforması parlament sammitinde eñ az 50 ülkeniñ vekilleri iştirak ettiler. Sammitte müim qararlar berildi, ve yarımadanıñ işğalden azat eyilmesi pek yaqındır. FREEДОМ telekanalınıñ canlı yayınında Qırımtatar Milliy Meclisiniñ azası Eskender Bariiev bunı ayttı.
«Birinci sammit tek keçken sene keçirildi, ekinci sammit ise endi bu sene keçirildi. Bu, müsbet bir inkişaf köstergiçidir, yani bir ilerige ketemiz. Bundan ğayrı, şuna diqqat celp etmege ister edim: parlament sammitinde iştirak etken ülkelerniñ sayısı pek arttı. İştirakçiler arasında tek demokratik ğarbiy ülkelerniñ yani Avropa ve Şimaliy Amerika ülkeleriniñ parlamentleriniñ vekilleri degil, Afrika ve Asiya ülkeleriniñ parlamentleriniñ vekilleri de bar ediler. Demek ki, Ukrainanen meraqlanuv seviyesi arta», – dep qayd etti o.
Bariiev bildirdi ki, parlament sammitiniñ müimligi, demokratik ülkelerde parlamentniñ endi qarar bermesidir.
«Ve Ukrainanı arbiy tarzda destek etüv aqqında laf etkende, Ukrainanı gumanitar tarzda, iqtisadiy tarzda destek etüv aqqında laf etkende, şuna diiqat celp etmelimiz: tamam parlamentler qarar berecekler. Tek işğalden azat etüv meselesi degil, reintegratsiya meselesi aqqında da laf etkende tüşünemlimiz ki, reintegratsiya ceryanı, işğalden azat etüv ceryanından daa çoq devam etecek», – dep Meclisniñ azası añlattı.
O diqqat celp etti ki, Qırım platforması sammiti vaqtında körüşüniñ bütün iştirakçileri Ukrainanı añladılar ve destek ettiler.
«Afrika ülkeleriniñ vekilleri bile, Avropa ülkeleri kibi olarnıñ silâğa, o qadar çoq resursqa saip olmağanlarına baqmadan, Avropa ev Amerika ülkelerini Ukrainanı em silâ, em paranen destek etmege çağırdılar», – dep Bariiev qoştı.
Meclisniñ azası tüşüne ki, Qırım platformasınıñ parlament seviyesini institutlaştırıp milliyleştirmek kerek ve sammitte söz aytqanda bunı bildirdi.
«Parlamentlerarası muntazam mesleat organını teşkil etmege teşebbüs etmege teklif ettiler. Onıñ adlı farqlı ola bilir, misal içün Qırım platformasınıñ Parlament assambleyası», – dep haber berdi o.