Ukraina Yuqarı Şurasınıñ İnsan aqları ve milletlerara munasebetler boyunca komiteti “Milliy mensüpligine köre sürgün etilgen şahıslarnıñ aqlarını ğayrıdan tiklev aqqında” Ukraina qanunınıñ leyhasını baqıp çıqtı

06 Iyün 2013

2013 senesi iyün 5 künü Ukraina Yuqarı Şurasınıñ İnsan aqları ve milletlerara munasebetler boyunca komitetiniñ toplaşuvı olıp keçti.

Onda bir sıra meselelernen beraber Meclis reisi, Ukraina halq deputatı Mustafa Cemilev tarafından azırlanğan “Milliy mensüpligine köre sürgün etilgen şahıslarnıñ aqlarını ğayrıdan tiklev aqqında” Ukraina qanunınıñ leyhası baqıp çıqıldı.

Ukraina parlamentiniñ birinci oquvında maqullenip, ekinci oquvğa azırlamaq içün yollanılğan Qanun leyhasınıñ muzakeresine Qırım Yuqarı Şurası Reisiniñ muavini Grigoriy Yoffe, Qırım Nazirler şurası reisiniñ muavini Valeriy Palçuk, Ukraina sotsial siyaset nazirligi yanında Milliy mensüpligine köre sürgün etilgen şahıslarnıñ aqlarını qoruv boyunca departament direktorı Pötr Plaksâ, Ukraina Tış işleri nazirliginiñ Yurt tışında yaşağan ukrainlernen bağlanuv ve medeniy-gumanitar işbirlik boyunca departament direktorı Vladimir Yatsinkivskiy, ait nazirlik ve idarelerniñ mütehassısları, insan aqları, milletlerara munasebetler ve aqsımlavğa qarşı küreş saasında yetekçi ekspertler celp etildiler. Qızğın ve devamlı muzakere vaqtında Qanun leyhasınıñ maddelerine teklif etilgen tüzetüvlerde bazı qapa-qarşılıqlar ortağa çıqtı

Mezkür qanun leyhasınıñ muzakeresinen bağlı keniş milliy ve halqara munaqaşalarnı, ekspertler ve sürgünlik aqibetlerini yoq etüv em de qaytıp keleyatqan sürgünlilerge er tarafolı yardım kösterüv ceryanınıñ başlanmasına imkân açacaq leyhanıñ bütünligi ve uyğunlığı saqlanıp qalmasına müellifniñ kesen-kes noqtai-nazarını esapqa alğan Komitet azaları bildirilgen fikirlerni tekrar baqmaq ve mezkür meseleniñ muzakeresine parlament organınıñ nevbetteki toplaşuvında bir daa qaytmaq qararını aldılar.

Öz nevbetinde Ukraina halq deputatı Mustafa Cemilev kendisi idare ettigi komitet bölüginiñ çerçivesinde ayrıca işçi ekspert gruppasını teşkil etmek imkânını baqmaqta.

Bu gruppa Komitet azaları tarafından maqullenmegen tüzetüvlerni başqa deputatlarnen birlikte işlep, olar boyunca Qanunnıñ ayrıca leyhasını azırlaycaq.