Jenevada işğal ve çatışma şaraitinde tamır halqlarınıñ aqlarını qorçalav aqqında qoşma tedbir olıp keçti

15.07.2026

Oraq ayınıñ 14-nde BMTnıñ Tamır halqlarınıñ aqları ihtisasiy mehanizminiñ (EMRIP) 19-ncı sessiyası çerçivesinde Cultural Survival ve BMTnıñ Bölügi ve Jenevadaki başqa halqara teşkilâtlar yanındaki Ukrayina Daimiy temsilciliginen beraber Qırımtatar Resurs Merkezi “Çatışma ve çatışmadan soñ ğayrıdan tiklenüv şaraitinde tamır halqları” qoşma tedbirini keçirdi.

Tedbirde BMTnıñ Bölügi ve Jenevadaki başqa halqara teşkilâtlar yanındaki Ukrayina Daimiy temsilcisi Yevheniy Tsumbalük, Qırımtatar Milliy Meclisiniñ azası, Qırımtatar Resurs Merkeziniñ İdare Reisi Eskender Bariyev, dünyanıñ farqlı ülkelerinden tamır halqları, halqara aq-uquq qorçalayıcı teşkilâtlar ve mütehassıs cemaatnıñ vekilleri iştirak ettiler.

Çıqışta bulunğanda Eskender Bariyev qayd etti ki, vaqtınca işğal etilgen Qırımda qırımtatar halqınıñ şimdiki taqip etilüvi Rusiyeniñ çoq asırlı tamır halqını yoq etüv siyasetiniñ devamı ola.

“Cenk cinayetleri ve insan aqlarınıñ bozulmasınıñ ilk sebebi işğal ola. Bugün olğan adiseler tesadüfiy olmay. Bu, 1783 senesi Rusiye imperiyası tarafından başlatılğan, 1944 senesi sovet rejimi tarafından devam ettirilgen ve 2014 senesi zemaneviy Rusiye tarafından yañıdan başlatılğan tamır qırımtatar halqına qarşı izçen genotsid siyasetiniñ devamı ola”, – dep Meclis azası qayd etti.

O, Qırımtatar Resurs Merkeziniñ işğal etilgen Qırımda insan aqlarınıñ bozulmasına dair nezaretniñ neticelerini taqdim etip, repressiyalarnıñ sistemalı olğanını ve özdeşliginiñ saibi olaraq qırımtatar halqına qarşı doğrutılğanını qayd etti.

“Bu raqamlar – isaiyat degil. Bu – insanlarnıñ taqdirleridir. Sadece faalciler degil, özdeşlik ve siyasiy subyektlikniñ saibi olğan halq taqip etile”, – dep Eskender Bariyev qayd etti.

Subet devamında iştirakçiler tamır halqlarınıñ işğal, silâlı çatışmalar ve müstemleke siyaseti şaraitinde qarşılaşqanı meselelerni muzakere ettiler, olarnıñ aqlarını qorçalamaq, halqara uquqnıñ bozulmasında qabaatlı olğanlarnı mesüliyetke çekmek ve tamır halqlarınıñ vekilleriniñ işğalden azat etüv ve cenkten soñ ğayrıdan tiklenüvnen bağlı ceryanlarda iştirakini temin etmek içün halqara mehanizmlerni quvetleştirmek kerekligini qayd ettiler.