Baş saifeHaberlerUkrayina Yuqarı Şurasında, 1944 senesi qırımtatar halqınıñ sürgünligine bağışlanğan “Tünevin cezalandırılmadı – bugün tekrarlana” sergisi açıldı

Ukrayina Yuqarı Şurasında, 1944 senesi qırımtatar halqınıñ sürgünligine bağışlanğan “Tünevin cezalandırılmadı – bugün tekrarlana” sergisi açıldı

13.05.2026

Ukrayina Yuqarı Şurasında, 1944 senesi qırımtatar halqınıñ sürgünligine bağışlanğan “Tünevin cezalandırılmadı – bugün tekrarlana” sergisi açıldı

Qırımtatar Milliy Meclisinen beraber Qırımtatar Resurs Merkezi ekspozitsiyanı teşkil etti. Sergi ukrayin ressamı Andriy Yermolenkonıñ 17 eserinden ibaret. Bular qırımtatarlarnıñ sürgünligi, Qırımnıñ işğalden azat etilmesi oğrunda küreş ve Ukrayina tamır halqlarınıñ aqlarını qorçalavına bağışlandı.

Serginiñ açılışında Ukrayina Yuqarı Şurasınıñ Reisi Ruslan Stefançuk, Qırımtatar Milliy Meclisiniñ Reisi Refat Çubarov, Qırımtatar Milliy Meclisiniñ azası, Qırımtatar Resurs Merkeziniñ İdare Reisi Eskender Bariyev, Ukrayina halq mebusı Tamila Taşeva ve Qırım Milliy varlıq fondunıñ reisi Lenur Mambet iştirak ettiler.

Serginiñ açılışında Refat Çubarov şunı qayd etti:

“Bu sergi tek 1944 senenesi faciasınıñ hatırlavı degil de, cezasız qalğan yamanlıqnıñ qaytarıluvı aqqında bir ikâye. O, keçmiş ve şimdiki zaman arasında bağ aqqında ayta, keregi kibi mahküm etilmegen cinayetler tekrarlana bile”.

Aynı zamanda Eskender Bariyev qayd etti ki, serginiñ tamam Ukrayina Yuqarı Şurasında açılşınıñ ayrı manası bar, çünki 2015 senesi tamam ukrayin parlamenti qırımtatar halqınıñ sürgünligini genotsid aktı olaraq tanıdı.

“Bugün bizler Ukrayina Yuqarı Şurasınıñ binasında serginiñ açıluvını tesadüfen yapmaymız. Birinciden, Yuqarı Şurağa sürgünlikni genotsid olaraq tanığanına teşekkürler bildirem. Bu qarar ve umumiy sistematik işimiz sayesinde dünyanıñ doquz devleti qırımtatar halqınıñ sürgünligini genotsid olaraq tanıdı”, — dep Eskender Bariyev qayd etti.

Ekspozitsiya qırımtatar halqınıñ sürgünligini genotsid aktı olaraq tanımağa dair halqara advokatlıq kampaniyasınıñ parçası ola ve sovet rejiminiñ cinayetleriniñ rusiye federatsiyasınıñ zemaneviy siyasetiniñ cinayetlerine oşağanına diqqat ayıra.

Tedbir iştirakçileri tarihiy hatıranıñ saqlap qaldırılması, qırımtatar halqınıñ sürgünliginiñ genotsid olaraq halqara tanılması ve rusiyeni Ukrayinağa qarşı zemaneviy cinayetleri içün mesüliyetke çektirmek kerekligini qayd ettiler.