Ukrayina Prezidentiniñ Qırımdaki temsilciliginde Qırımtatar halqınıñ genotsid fedalarını añma kününe tedbir olıp keçti

16.05.2026

Mayısnıñ 15-nde Ukrayina Prezidentiniñ Qırım Muhtar Cumhuriyetindeki Temsilciliginde Qırımtatar halqınıñ genotsid fedalarını añma kününe ve 1944 senesi qırımtatar sürgünliginiñ 82 yıllığına bağışlanğan kompleks tedbir olıp keçti.

Tedbirde Ukrayinadaki çetel diplomatik missiyaları, devlet akimiyet organları, ihtisasiy müiti ve cemaat vekilleri, em de Qırımtatar Milliy Meclisiniñ vekilleri Refat Çubarov, Gülnara Bekirova ve Riza Şevkiyev iştirak ettiler.

Programma çerçivesinde musafirlerge tarihçı Gülnara Abdulayevanıñ 1944 senesi sürgünligi ve qırımtatar halqınıñ tarihına bağışlanğan kuratorlığı altında tematik sergi taqdim etildi. Sergide qırımtatarlarnıñ sürgünlik yerlerinde saqlağan ve Qırımğa qaytqan soñ ketirgen şahsiy eşyaları bar edi: qoranta fotoresimleri, ananeviy urba, ev eşyaları ve sürgünlikte yazılğan Quran-ı Kerim.

“Kelecekni şekillendiren hatıra: işğal şaraitinde qırımtatar medeniyetiniñ saqlanuvı” adlı panel munaqaşası, qırımtatar halqınıñ Rusiye işğali şaraitinde öz kimligini saqlavında medeniyet, sanat ve tarihiy hatıra rolüne bağışlandı. Munaqaşalarda Qırımtatar Milliy Meclisiniñ Reisi Refat Çubarov, Ukryain institutınıñ baş müdiriniñ muavini Alim Aliyev, jurnalist ve “Aqiqiy tarih” leyhasınıñ tesisçisi Akim Galimov, yazıcı Anastasiya Levkova, dizayner ve ressam Feride Kurtmamedova iştirak ettiler. Novopeçersk mektebiniñ “Ziyalı sesler” qırımtatar til-medeniy leyhasınıñ idarecisi Olğa Kropivyanska idareci olaraq iştirak etti.

Çubarov 1944 senesi sürgünligi qırımtatar kimliginiñ yoq etilmesi boyunca sistematik siyasetnen beraber ketkenini hatırlattı – hususan Qırım mesken yerleriniñ adlarınıñ deñiştirilmesi ve Qırımnıñ tamır halqı aqqında hatıra silinmesi.

“Qırımnıñ işğalden azat etilmesi – qırımtatar halqınıñ ğayrıdan doğuvı içün bir şanstır”, – dep Refat Çubarov qayd etti.

Muzakere iştirakçileri qırımtatarlarnıñ medeniy ve tetqiqat teşebbüsleriniñ inkişafı, tarihiy hatıra saqlanması ve Qırımğa nisbeten Rusiye müstemleke siyasetine qarşılıq kösterilmesiniñ emiyeti aqqında da laf ettiler.

ФОТО: Представництво Президента України в Автономній Республіці Крим