Kıyivde qırımtatar tili ve edebiyatı umumukrayin olimpiadasınıñ ğalipleri qayd etildi

02.04.2026

Kıyivde 2025 senesi ilk sefer umumukrayin statusını alğan tasil leyhası – Qırımtatar tili ve edebiyatı umumukrayin talebe olimpiadasınıñ mukâfatlandıruv merasimi olıp keçti.

Olimpiadanıñ teşebbüsçisi “Birlik School” qırımtatar litseyi “Ukrayina Küçük ilimler akademiyası” Milliy merkezinen işbirlikte oldı. Bu teşebbüs Ukrayina mekteplerinde qırımtatar tiliniñ resmen tanılması içün müim bir adım oldı.

2025 senesi Olimpiadada 11 talebe iştirak etti, 2026 senesi ise iştirakçilerniñ sayısı 25-ke qadar arttı. Bu sene final, umumukrayin basamağına 8 mektep talebesi kirdi – “Birlik School”, Kıyiv ve Kıyiv vilâyetiniñ diger tasil müessiselerinden dörter talebe.

Olimpiadalarnıñ finalistleri:
Madgazieva Beyan, Mamutova Fatime, Hayrullaev Sufyan, Hayrullaeva Asiye, Kadırova Safiye, Mambetova Meryem, Seitahliev Muslim ve Abdulgazieva Anife. 

Olarnıñ arasında birinci derece diplomlarını “Birlik School” qırımtatar litseyinden Madgazieva Beyan ve Hayrullaeva Asiye ve Kıyiv şeeriniñ Darnıtsâ rayonındaki Skandinav litseyinden Mambetova Meryem aldılar.

İştirakçilerniñ azırlanuvında litsey ocaları müim rol oynadılar – qırımtatar tili ocası Gülnaz Acıgeldieva ve qırımtatar edebiyatı ocası Afize Emiramzaeva, olar 2022-2032 seneleri içün qırımtatar tiliniñ inkişaf kontseptsiyasına esaslanıp, talebelerniñ til ve edebiyat qabiliyetleriniñ inkişafı üzerinde muntazam çalışalar.

Bayram merasimi vaqtında ğalipler ve mukâfat qazanğanlar Ukrayina Küçük ilimler akademiyasınıñ diplomları ve mukâfatlarını, Meclis reisi Refat Çubarov ve Meclis azası Gülnara Bekirova tarafından berilgen Qırımtatar Milliy Meclisiniñ fahriy yarlıqları ve bahşışlarını aldılar.

Refat Çubarov hayırlav sözünde, böyle teşebbüslerniñ kirsetilmesi qırımtatar tiliniñ saqlanuvı ve inkişafında, genç nesilge qol tutuvda ve Ukrayinada yañı tasil ananeleriniñ şekillenmesinde müim adım olğanını qayd etti.