Kıyivde Dünya tamır halqları halqara künü qayd etilecek

28.07.2026

Arman ayınıñ 9-da Kıyivde Dünya tamır halqları halqara künü munasebetinen Ukrayina tamır halqları – qırımtatarlar, qaraylar ve qırımçaqlar – içün tedbir keçirilecek.

Tedbirniñ maqsadı – Qırım tamır halqlarınıñ tarihı, medeniyeti ve zemaneviyligine diqqat çekmek, em de Qırım yarımadasınıñ vaqtınca işğali şaraitinde olarnıñ özdeşliginiñ saqlanmasınıñ müimligini hatırlatmaqtır.

Ziyaretçiler içün kün devamında qırımtatar, qaray ve qırımçaq mevzulı yerler çalışacaq, anda musafirler Ukrayina tamır halqlarınıñ ananeleri, medeniy mirası ve yaşayışınen yaqından tanış ola bilirler.

Tedbirniñ programması, medeniy mirasnıñ saqlanuvı ve zemaneviy çağıruvlar meselesine bağışlanğan panel munaqaşası, tarihiy resimlernen üç sergisi ve kuratorlıq ekskursiyasınen “Qırımnıñ yüzü ve hatırası” fotoresim alanı, ustalar yarmalığı, aş meydançığı, balalar içün yer ve qırımtatar icracıları ve icadiy taqımlarınıñ iştirakinen bayram kontsertini közde tuta.

Tedbir vaqtında “Serbest Qırımğa mektüpler” yeri çalışacaq, anda istegen er kes Rusiye Federatsiyası tarafından qanunsız tutulğan ukrayin siyasiy mabüslerine qoltutuv sözlerini yaza bilir.

Arman ayınıñ 9-nda er yıl qayd etilgen Dünya tamır halqları halqara künü tamır halqlarınıñ öz tillerini, medeniyetlerini, ananelerini ve tarihiy hatıralarını saqlamaq aqqını qayd etmek içün bir fırsat ola. Ukrayina içün bu, halqara toplulıqnıñ diqqatını Qırım tamır halqlarınıñ Rusiye işğali şaraitinde vaziyetine celp etmek ve olarnıñ öz tuvğan toprağında yaşamaq ve inkişaf etmek aqqı oğrunda küreşine qol tutmaq içün de bir fırsattır.

Tedbirde iştirak etmek içün evelden qayd etilmek kerek. Bayram yeri ve vaqtı aqqında malümat qayd etilgen iştirakçilerge merasimden 24 saat evel elektron poçta vastasınen yollanılacaq.