Kıyivde Qırımnıñ işğalden azat etilmesi oğrunda küreşke bağışlanğan yañı mektüp pulu taqdim etildi

06.07.2026

Oraq ayınıñ 6-nda Kıyivde “Qırımda başlandı – Qırımda biter!” yañı mektüp pulu kâğıtınıñ taqdim merasimi olıp keçti, onı “Ukrpoşta” AT “Öz markası” leyhası çerçivesinde Qırımtatar Resurs Merkezinen birlikte yarattı. Yañı mektüp pulu vaqtınca işğal etilgen Qırımğa, onıñ sakinleriniñ qarşılığına ve yarımadanıñ işğalden azat etilmsi oğrunda küreşke bağışlana.

Mektüp pulu ğayesi Qırımtatar Resurs Merkezi tarafından işlep çıqarıldı, bediiy resimini ise ukrayin ressamı ve arbiy hızmetçisi Andriy Yermolenko yaptı. Müelliflerniñ aytqanlarına köre, bu mektüp pulu ukrayin cemiyetine ve halqara ortaqlarına Qırımnıñ vaqtınca işğal etilmesi ve işğalden azat etilmesi kerek olğanını hatırlatmaq içün azırlanılğan.

Taqdim etüvde “Ukrpoşta” ATnıñ filatelistik mahsulatı idaresiniñ yolbaşçısı Nataliya Muhina, Qırımtatar Resurs Merkeziniñ idare reisi, Qırımtatar Milliy Meclisiniñ azası Eskender Bariyev, ressam Andriy Yermolenko, rejissör ve “Qırım evi” DTnıñ reisi Ahtem Seitablayev iştirak ettiler.

Tedbirde çıqışta bulunğan Ahtem Siytablayev: “Bizler – yaratmağa sevgen ukrayin siyasiy milletimiz”, dep qayd etti ve bunıñ kibi medeniy teşebbüsler Qırımnı qaytarmaq oğrunda küreşte daa bir adım olğanını qayd etti. Aynı zamanda Eskender Bariyev qayd etti ki, Qırım mevzusı ukrayin ve halqara haber alanında daima olıp qalmaq kerek.

O taqdim etilgen soñ yañı mektüp pulunı mahsus söndürüv merasimi olıp keçti.

ФОТО: Руслан Кошовенко