Siyasiy mabüs Abdullaevni rf müstemlekesiniñ ceza izolâtorından çıqarıldı

02 Mayıs 2023

Ekimniñ tevsiyesine mücibi Kremlniñ qırımtatar siyasiy mabüsi Uzeyir Abdullaevni Salavat şeerindeki (rusiye) müstemlekeniñ ceza izolâtorından çıqarıldı. Umumen anda adam, qalp hastalığını çekerek, eñ as 50 kün keçirdi.

İçtimaiy birleşme “Qırım birdemligi” bu aqqında haber berdi.

Aqrabalarınıñ sözlerine köre, Abdullaevniñ ayağınıñ muntazam şişigini çeke ve uzun vaqıt devamında turamay. Yataq yerini yüzbeznen qapatqanı içün çiçek ayınıñ 19-ında ceza izolâtorına ketirildi.

Keçenlerde Uzeyir Abdullaev haber berdi ki, müstemlekede ekim oña alınğan qalp qusurı diagnozını qoydı. Bundan ğayrı, alergik rinit onı raatsız etti, ilâçlarğa ihtiyac duydı.

2019 senesi bozarğan aynıñ 8-inde Rostov-na-Donudaki (rusiye) makeme Rustem İsmailovnı ve Ayder Saledınovnı 14 senege, Emil Cemadenovnı 12 senege maküm etti. Teymur ve Uzeir Abdullaevni 17 ve 13 senege maküm etti. “Hizb-ut-Tahrir”niñ faaliyetine sanki ait olğanları içün olarnı tuttılar.