Şamil Alâdinniñ 100 yıllığına

12 Noyabr 2012

Qırım nazirler şurasınıñ emiri ile bu sene Qırımda qırımtatar halqınıñ  klassik şairi, yazıcısı, cemaat erbabı ve oca Şamil Alâdinniñ 100 yıllığına bağışlanğan tedbirler teşkilâtlandırılıp keçirildi.

Bu tedbirler çerçivesinde yarımadamıznıñ umumtasil mekteplerinde çalışqan oca ve oquğan talebeler arasında cumhuriyet yarışı ilân etilgen edi.

Sentâbrniñ 20-den oktâbrniñ 26-sına qadar yarış talaplarına esaslanıp Şamil Alâdinniñ hayatı, icadı ve faaliyetine bağışlanğan mevzuda Qırımnıñ 21 regionından 41 oca usuliy çalışmalarını ve 70 talebe  icadiy işlerini  Qırım tasil nazirliginiñ Qırımtatar tilinde tasil sektorine yolladılar. Tasil nazirliginiñ ve Diplomdan soñ tasil institutınıñ hadimlerinden ibaret olğan jüri azalarınıñ qararı ile 12 oca ve 9 talebe finalğa çıqıp, ğalebe qazandılar.

İş bu yarışnıñ neticeleri güzel edebiy-bediiy programma olaraq Aqmescitnıñ 4 sanlı mektebinde noyabr 11 künü tedbir olaraq keçirildi. Ğalebe qazanğan oca v ye talebeler  Qırım Tasil ve ilim, sport ve gençlik nazirligi tarafından diplom ve para sertifikatı ile taqdirlendiler.

Ğalipler arasında Aqmescit, Aq-Şeyh, Bahçisaray, İçki, Kezlev, Or qapı ve Seitler regionlarınıñ ocaları ve talebeleri ziyadedir.

Taqdimname tedbirinde bulunğan QYUŞ deputatı, Milliy Meclis azası, “Maarifçi” birleşmesiniñ reisi Safure Kacametova, Qırım tasil ve ilim, sport ve gençlik naziriniñ muavini  V.A. Buyakeviç,  Şamil Alâdinnıñ qızı Lilâ Alâdinova ğalebe qazanğan oca ve talebelerni hayırlap, böyle yarışlarnıñ emiyeti milliy tasilniñ inkişafına faydalı olğanını qayd ettiler ve iş bu yarışnı keçirüvine mesülietli yandaşqan Qırımtatar tilinde tasil sektorınıñ mündiri Zarema Suleymanova ve baş mütehassisi Şefiqa Temeşke teşekkür bildirdiler.

Tedbirni keçirilüvine Aqmescit ş. 4 sanlı mektepniñ müdiri A. Stotskaya ve şu mektepniñ ana tili ocası Gülnara Fevzi salmaqlı isse kirsetkenleri memnüniyetnen qayd etildi.