Rusiye, siyasiy mabüs Remzi Bekirovnı belli olmağan yerge etap etmege başladı

09.07.2024

Siyasiy mabüs, içtimaiy jurnalist Remzi Bekirovnı Krasnoyarsk vilâyetiniñ Yeniseysk 2. apishanesinden etap ettiler. Beş sene Rusiye apishanesinde keçirgen soñ, onı sert rejimli müstemlekege etap eteler, lâkin qaysı yerge etap etkenlerini aytmaylar. Onıñ ömür arqadaşı Halide Qırım birdemligine bunı ayttı.

“Onı sert rejimli müestemlekege etap eteler. Ne vilâyet ve ne şeer bellidir”, – dep qayd etti o.

İçtimaiy jurnalistni oraq ayınıñ 5. künü etap etecek ediler. Birinciden Krasnoyarsknıñ tranzit noqtasına.

“O yerde çoq qala bilem. Ve soñ, maña belli olmağan bir yönelişte [alıp keteler]”, – dep Bekirov mektübinde yazdı.

Bundan evel Remzi Bekirovnı Qırımğa yaqın bir müstemlekege etap etmege red etken ediler. O, Rusiye Federatsiyasınıñ Rostov vilâyetinde apis cezasını çekmege istey edi. Amma kiçik aynıñ 24-nde Rusiyeniñ sekiz bölgesiniñ, şu cümleden Don bölgesiniñ, tüzetüv müessiselerinde “orta seviyeli qarşılıq” kirsetilgeni sebebinden onı anda etap etmek imkânsız.