Romaniya ve Qırım – özara işbirlik istiqballeri

15 Noyabr 2012

Noyabr 15 künü Qırım müendislik-pedagogika universitetiniñ qırımtatar ve türk edebiyatı kafedrasında “Romaniya ve Qırım – özara işbirlik istiqballeri” mevzusında Romaniya ve Qırım işbirliginiñ meseleleri boyunca tögerek masa keçirildi

Programmada Romaniya delegatları Romaniya Qırımtatar birleşmesi reisiniñ birinci yardımcısı Samir Menan, Buharest universitetiniñ professorı, türkşınas filolog Aciemin Bavbek, “Qaradeñiz” gazetasınıñ esasçısı, professor Cenan Bolat, Köstence şeerindeki Övidius universitetiniñ professorı, sanatşınas İbram Nureddin, Qırımtatarlar birleşmesi Mecidiye şeeri idaresiniñ reisi Şenol Murat, Milliy Meclis tışqı alâqalar bölüginiñ başı Ali Hamzin, Qırım müendislik-pedagogika universitetiniñ qırımtatar ve türk filologiyası fakultetiniñ dekanı, filologiya ilimleri namzeti Raneta Ğafarova, qırımtatar ve türk edebiyatı kafedrasınıñ müdiri, filologiya ilimleri namzeti Lenyara Selimova, qırımtatar ve türk edebiyatı kafedrası müdiriniñ muavini, filologiya ilimleri namzeti Ahtem Celilov, Qırım Gumanitar universiteti doktoranı, pedagogika ilimleri namzeti Enise Abibullayeva iştirak etip, qırımtatar tiliniñ umumiy latin urufatına keçüv, Romaniyada yaşağan qırımtatarlarnıñ tilindeki şive hususiyetleri, oquv qullanmalarnen bağlı meselelerni muzakere ettiler.

Romaniyada yaşağan qırımtatarlar tiliniñ vaziyeti boyunca çıqış yapqan Samir Mennan, “Qaradeñiz” gazetasınıñ faaliyeti aqqında ikâye etken Cenan Bolat, qırımtatar tiliniñ şive luğatını çıqarmaqnı planlaştırğan kafedranıñ maqsadlarınen paylaşqan Lenyara Selimova müim meselelerni köterdiler. Eki taraf arasındaki işbirlik, til siyaseti aqqında aytqan Alim Hamzin, semetdeşlerimizniñ salmaqlı isselerini qayd etti. Pedagogika ilimleri namzeti Enise Abibullayeva fakultetniñ Dobrucadaki mektep ocalarınen 2006-2007 seneleri birlikte yapqan işleri aqqında tafsilâtlı malümat berdi.

Tögerek massa etrafındaki subet devamında qırımtatar tili qaidelerinen bağlı leyha, latin urufatında qırımtatar tilinde neşir etilgen gazeta ve mecmualar taqdim etildi.

Tedbirniñ soñunda nevbetteki körüşüvni Dobrucada keçirmek istegi bildirildi.