rfnıñ tolu miqyaslı tecavuzınıñ ilk saatlerinde Herson vilâyetinde 17 yaşındaki qırımlı Emir Bilâlov öldi

14 Sentâbr 2022

Fotoresim: Memorial hatıra platforması

Rfnıñ Ukrainağa tolu miqyaslı tecavuzınıñ ilk saatlerinde 17 yaşındaki qırımlı Emir Bilâlov öldi. Facebook saifesinde ‘Memorial hatıra platforması: rusiye tarafından öldürilgenler’ bu aqqında haber bere.

Fevral ayınıñ 24-ünde saat 07:00de Herson vilâyetiniñ Semıhatka köyünde yerleşken ana-babasınıñ evine snarâd urdı. Oğlan tamam ana-babasınıñ evinde edi – online oquv vaqtında keldi, – haberdar etile.

Emirnıñ qarını, sol omuzı, bütün bedeni ve yüzü parçalarnen yaralandı. Yaralar öldürici edi.

Oğlan Qırımda doğdı, soñ senelerde Zporijjâ vilâyetiniñ Melitopol şeerinde yaşay edi. Anda Tavriya devlet agrotehnikiy universitetiniñ kompyuter tehnologiyası bölüginde oquy edi. Bediiy sanat ve raqamiy resimlernen meraqlana edi.

– Emir mektepni altın medalnen bitirdi. Acayip resimlerni yarata edi, pek istidatlı, aqıllı ve merametli bir insan edi, – dep ölgen oğlannıñ ablası añlattı.

Ondan ğayrı, Emir Bilâlnıñ ana-babası qaldı.

Rus ordusı tarafından öldürilgen er kes aqqında añlatmaq içün ‘Memorial hatıra platforması’ yaratıldı.