Refat Çubarov Hotiv akademik litseyiniñ talebeleri ile körüşti

08.04.2026

Çiçek ayınıñ 8-de Qırımtatar Milliy Meclisiniñ reisi Refat Çubarov Hotiv akademik litseyiniñ 10-11 sınıf talebeleri ile körüşti. Tedbirde tahminen 100 mektep talebesi iştirak etti.

Körüşüv vaqtında talebeler Meclis reisi ile subetleşip, Qırım tarihı aqqında şahsiy tecribe vastasınen ikâye etip, qırımtatarlarnıñ aqları, azatlığı ve özgünliginiñ saqlanuvı oğrunda küreşi aqqında ögrene bildiler.

Tarihnıñ facialı saifelerine ve 1944 senesi mayısnıñ 18-de sovet rejimi tarafından qırımtatar halqınıñ genotsidi, em de 2014 senesi Ukrayinağa qarşı Rusiye tecavuzı ve Qırım işğalinen bağlı zemaneviy çağıruvlarğa ayrı diqqat ayırıldı.

Körüşüv açıq dialog formatında keçti: talebeler faal sürette sual berdiler, qırımtatar halqınıñ tarihı, medeniyeti ve bugüninen meraqlandılar.

Subet devamında gençler ile böyle tasil körüşüvleriniñ emiyeti qayd etildi, hususan Qırımnıñ devam etken işğali şaraitinde. Yarımadanıñ kerçek tarihını saqlav, qırımtatar halqınıñ sürgünligi aqqında hatıra ve Qırımnıñ işğalden azat etilmesi içün zemaneviy küreşni añlamaq, genç nesilniñ añı şekillendirilmesi içün pek müimdir.

Gençlernen canlı dialog, açıq subet ve tasil teşebbüsleri sayesinde Qırım, onıñ tamır halqı ve Ukrayinanıñ topraq bütünliginiñ ğayrıdan tiklenmesi içün umumiy küreş aqqında bilgiler berile.