Qurban Bayramıñız Mubarek olsun!

25 Oktâbr 2012

Aziz vatandaşlar, qıymetli Qırım musulmanları!

Muqaddes Qurban bayramı yaramadamızğa kelmekte. Büyük eyilik cümlemizge hayırlı olsun!

Yapacaq ibadetleriñizni, çalacaq qurbanlarıñıznı Alla Taalâ maqbul eylesin ve bütün ümmetimizden razı olsun!Cümle qorantalarımızda muabbetlik, sağlıq, barlıq, baht ve quvanç üküm sürsin, bol sofralar olsun!

Vatan, milliylik duyğularımız pekinmesine, birlik-beraberligimiz qaviyleşmesine doğrulanğan areketlerimiz ep ilerisin ve evlâtlarımız olarnıñ neticesi – Qırımda saip olmamız ile tolusınen faydalansınlar.

Yaqın arada olacaq sınavlar – saylavlardan da muvafaqiyetli keçmek qısmet olsun. Bir ümmetke, bir milletke mensüpligimizni numayış eteyik – Milliy Qurultaynıñ muracaatına qol tutayıq!

Bayramlarımız, aydın künlerimiz daima devam etip, halqımıznıñ yaralarına şifa olsun!

Qırımtatar Milliy Meclisi