Menu

Qırımtatar siyasiy mabüsleri öz advokatlarına uquqiy statusnı qaytarıp bermege soraylar

03 Oktâbr 2022
Qırımtatar siyasiy mabüsleri öz advokatlarına uquqiy statusnı qaytarıp bermege soraylar

Qırımnıñ siyasiy mabüsleri RF advokatlar federal meclisine qırım uquqçılarına advokat statusını qaytarıp berüv ricasınen hitap ettiler, dep QIRIM.News haber bere.

Alim Sufyanov, Seyran Hayredinov, Yaşar Muyedinov, Rustem Şeyhaliyev, Alim Karimov, Ernes Ametov ve onlarca başqa mabüs RF advokatlar federal meclisine ariza endi yolladılar.

Lilâ Gemeci, Nazim Şeyhmambetov ve Rustem Kâmilev adlı advokatlar Qırımnıñ siaysiy mabüsleriniñ çoq cinaiy davalarında qorçalayıcılar olaraq çıqış yapa ediler, amma rus Adliye nazirliginiñ qararından soñ çoq uquiy hızmet berüv imkânından marum etilgen oldılar.

Bunıñ içün maznunlar bir hitap yazdılar. Anda olar, litsenziyadan marum etilgen advokatlarnıñ mütehassıslığını ve olarğa inanğanlarını qayd eteler.

– Çoq sene boyunca olar em bizge, em de ailelerimizge yardımcı olalar. İşini sevgen ve yahşı bilgen olarnı çalışqan ve mütehassıs bilgili advokatlar olaraq çoq senedir bilem, – dep maznun faalci Rustem Şeyhaliyev mecliske arizasında yaza.

Maznunlarnıñ qısmı şuna atıf ete ki, olar tek bu mütehassıslarğa inana bilirler, çünki olar cinaiy davalarını tamam başlanğıcından idare eteler. 

2 ay evel Çeçenistan Adliye nazirligi qırımtatar advokatlarını litsenziyalarından marum etti. Şimdi olar cinaiy davalarda iştirak etemeyler.