Qırımtatar halqı Meclisiniñ Beyanatı

17 Oktâbr 2012

Qırımtatar halqı Meclisiniñ Prezidiumı “Batkіvşçina” birleşken muhalifet erkânına kirgen siyasiy partiyalar ile bir mandatlı saylav dairelerdeki vaziyet boyunca söyleşüvler neticesine esaslanaraq Ukrainanıñ milliy-demokratik küçleri tarafdarları olğan saylavcılarnı oktâbr 28 künü Ukraina halq deputatlarını saylav vaqtında daa ziyade birleştirmek maqsadında şu aqta beyanat ete:

1. Olacaq saylavlar meselesinde Qırımtatar halqı Qurultayınıñ qararlarına boysunaraq iş tutqan Qırımtatar halqı Meclisiniñ № 2, № 3 ve № 10 bir mandatlı saylav dairelerde namzetler kelişilmesi boyunca bildirgen, lâkin siyasiy ortaqlar birinci basqıçlarda buña emiyet bermegen, pozitsiyası olar tarafından 2012 senesi oktâbr 15 künü Birleşken muhalifet qurultayında esapqa alındı.

2.Öz saylavcıları ögünde mesülietini añlayaraq, bunıñ kibi de “Batkіvşçina” birleşken muhalifetniñ №10 bir mandatlı saylav dairesinde Ahtem Çiygozniñ namzetine qoltutmağa azırlığını köz ögüne alaraq, Qırımtatar halqı Meclisiniñ prezidiumı №2 bir mandatlı saylav dairesinde deputatlıqqa namzeti cedvelge alınğan Nariman Celâlovğa öz namzetini qaytarıp almaq ve saylavlardan çıqmaqnı tevsiye ete.

3. Qırımtatar halqı Meclisiniñ Prezidiumı Nariman Celâlovğa Qurultay ve Meclis qararlarına boysunaraq çalışqanı ve olacaq saylavlardan çıqmağa razılıq bergeni içün teşekkür bildire.

4. Aynı zamanda Meclis Prezidiumı özüniñ siyasiy ortaqlarınıñ, birinci nevbette “Batkіvşçina” siyasiy partiyasınıñ Qırım teşkilâtı reberleriniñ, diqqatını saylav devamında Birleşken muhalifet tarafdarları olğan saylavcılarnı şaşmalatqan bir taraflı, kelişilmegen areketlerni yapmamaq lâzimligine celp etti.

Qırımtatar halqı Meclisiniñ Prezidiumı bütün saylavcılarnı 2012 senesi oktâçbr 28-de olacaq saylavlarda faal iştirak etmege ve “Batkіvşçina” birleşken muhalifetke qoltutmağa çağıra.

Qırımtatar halqı Meclisiniñ Prezidiumında 13 oktâbr künü qabul etildi