Qırımnıñ sakini Kırılo Barannıkqa advokat almaq içün para toplaylar

05 Iyün 2024

“Avtozak Live” uquq qorçalayıcı teşkilâtı, rusiye akimiyeti tarafından diversiyada qabaatlanğan Qırımnıñ sakini Kırılo Barannıkqa advokat almaq içün para toplamağa başladı.

Faalciler qayd ettiler ki, Barannıknıñ davası rusiye makemesine endi yollandı, onıñ iştirakinen birinci oturış ise bozarğan aynıñ 13. künü olacaq, dep Qırım.Aqiqat bildirdi.

“Kırılonıñ ailesine advokat hızmetini ödemege yardım etiñiz! Şı anda imaye masrafları arttı, çünki Kırılonıñ advokatı aftada eki kere Rostov-na-Donudaki makeme oturışlarına ketmeli olacaq”, – bildirdiler.

2023 senesi mayıs ayınıñ 30. künü Aqmescitteki Salğır yalı kenarında Barannıknı tuttılar. Onıñ başına çavul taqıp, FSB idaresine alıp ketirdiler. Barannıknı soradılar ve o, kiçik aynıñ 23. künü Bağçasaray rayonınıñ Bazarçıq köy yanındaki demiryolnı patlatqanını tanıdı. Qabaatlanğan adam, advokatı Oleksiy Ladinge quvetçilerniñ onı urğanları ve azaplağanları, çoqmarnen namusına keçmege ve anasını öldürmege qorqutqanlarını añlattı. Advokat, adamnıñ bedeninde yanıqlar ve uruv izleriniñ mevcudiyetini tasdıqladı.