Qırımda rusiye eñ az 800 raketa yerleşti

16 Noyabr 2023

Vaqtınca işğal etilgen Qırımda RF eñ az 800 raketa ketirip yerleştirdi. Olar, bu qış mevsiminde Ukrainağa energetik terror vaqtında qullanılacaq.

Milliy telemarafonnıñ canlı yayınında Mudafaa ve qaravul quvetleriniñ birleşken idare matbuat merkeziniñ reberi Nataliya Humenük bu aqqında haber berdi, dep Suspilne Qırım bildirdi.

“Biz İstihbarat baş idaresiniñ bilgilerine esaslanğanımıznı ayttıq. Qırım yarımadasında duşman, balaban arbiy hab açtı, şu cümleden şimdi anda “Kalibr” türlü raketalar bar, Qırım yarımadasından “Oniks” raketaları da uçurılır. Duşman quvetini arttırır – bu bes-bellidir. Bilgilerimizge köre energetik terror basamağı içün duşman umumen eñ az 800 raketa qullanmağa azır”, — dep haber berdi o.

Hatırlatamız ki, 2022 senesi orta küz ayında Rusiye, Ukrainanıñ eeergetik astyapısına kütleviy şekilde ateş açmağa başladı. Bütün ülke boyunca millionlarca qullanıcı elektriksiz qaldı. İşğalciler, Ukrainanıñ şeerlerini raketalar ve açıcısız aletler vastasınen ücüm ettiler. Olar, kritik astyapı obeytklerine çoq zarar ketirdi.