Qırımda işğalciler, qırımtatar bayraqları sebebinden maşnalarğa para cezasını berdiler

26 Iyün 2023

Keçenlerde Qarasuvbazar rayonındadi Aq Qaya yanında rus politsiyası, milliy bayraqlar sebebinden qırımtatarlarnı tuttı. Bundan soñ işğalciler, maşna numayışınıñ eki iştirakçisine 40 000 rublelik para cezasını berdiler.

“Qırım birdemligi” bu aqqında haber berdi.

• Politsiyanıñ rayon bölüginiñ işçileri, eki adamğa: 73 yaşındaki Rustem Kurnosov ve 65 yaşındaki Enver Useinovğa qarşı protokol tizdiler. Useinov, saqatlığnıñ 3. gruppasına ait ola ve şeker diabeti hastalığını çeke. Onen beraber politsiyağa Ebabil İbrahimov ketirildi. O, qayanıñ töpesinde olğan şeylerniñ videosını çıqarğan, – beyanatta yazıldı.

Aq Qayağa bayraqlarnen ketmek içün qırımtatarlar bir qaç maşnanen kete ediler. Şiarlar ve çağıruvlar aytmadılar, dep faalciler añlattılar. Politsiyacılar olarnıñ añlatmalarını aldılar. İbrahimovnen subet etken soñ onı yiberdiler, aqrabaları onı alıp kettiler.

İşğalciler aytalar ki, bu, bayraqlarnen ve maşnalarnen ve eñ az 50 insandan ibaret olğan kütleviy, qanunsız halq ögündeki tedbirdir.

• Bu kün aqşam maalinde Qarasuvbazar rayon makemesi Rustem Kursonov ve Enver Useinovğa 20 biñ rublelik para cezasını berdi. Qırımtatarlarğa qarşı haber bermeden halq ögündeki tedbirni teşkil etüv ya da keçirüv (RFnıñ MBQniñ 20.2 maddesiniñ 2. qısmı) aqqında protokol tizdiler, – dep bildirildi.

Memuriy protokolda Kurnosov añlattı ki, ” Pazar künü kezintisini tazsdıqlamaq kerekligini bilmey” ve “ne bozğanını bilmey”.

Aqşam maalinde faalciler Elmaz Akimova haber berdi ki, Aq Qaya yanında rus bayrağı köterildi. 

• O zaman Aq Qaya yanında rus bayrağı köterildi. Faalciler, politsiyağa o insanlarnıñ “halq ögündeki tedbirni keçirüv” aqqında malümatname bergenine şikâyet ettiler, elbette, politsiyanıñ işçileri özlerini biraz coyıp, cevap bermediler, – dep Akimova añlattı.