Ukrayina prezidenti Meclisniñ uquqiy statusını qayd etken buyruqnı imzaladı ve qırımtatar halqınıñ vekillerini devlet mukâfatlarınen taqdirledi

03.04.2026

Ukrayina prezidenti Volodımır Zelenskıy Ukrayina tamır halqına nisbeten devlet siyasetini quvetleştirmek ve qırımtatar halqına qol tutmaq maqsadınen 289/2026 ve 293/2026 nomeralı buyruqlarını imzaladı.

Vesiqalardan biriniñ esas maddesi Ukrayina Nazirler Kabinetine qırımtatar halqınıñ temsil organınıñ uquqiy statusını Qırımtatar Milliy Meclisine berüv meselesiniñ çezilmesini acele sürette temin etmege avale etmektir.

Bu qarar “Ukrayina tamır halqları aqqında” Ukrayina Qanunınıñ maddelerini amelge keçirüvde müim bir adım ola ve devletniñ Meclisniñ qırımtatar halqınıñ temsiliy organı statusını qayd etüvge nisbeten tutqan noqta-i nazarını tasdıqlay.

Öz çıqışında Prezident qayd etti ki, imzalanğan buyruq Qırımnı, onıñ sakinleri ve tamır qırımtatar halqınıñ aqlarını qorçalamaq içün imkânlarnı quvetleştirmege, em de Qırımtatar Milliy Meclisiniñ statusını uquqiy ve siyasiy ceetten qayd ete.

Prezident şunı da qayd etti ki, Qırımtatar Milliy Meclisi qırımtatar halqınıñ temsiliy organı vazifelerini daima eda ete edi, ve devlet bunı “Ukrayina tamır halqları aqqında” Ukrayina qanunına köre belgiley:

“Meclis er vaqıt qırımtatar halqınıñ temsiliy organı edi ve ola. Böylece siziñ imkânlarıñıznıñ daa da küçlü olması ve bizim umumiy ukrayin imkânlarımıznıñ daa da küçlü olması içün biz bunı uquqiy ve siyasiy ceetten qayd etemiz”.

Merasim vaqtında Ukrayina Prezidenti qırımtatar halqınıñ vekillerini devlet mukâfatlarınen taqdirlep, olarnıñ Ukrayina küçlenüvine, Ukrayina devlet suvereniteti ve topraq bütünliginiñ qoruvına, cemaat ayatınıñ çeşit saalarınıñ inkişafına, cemaat ve uquq qorçalayıcı faaliyetine qoşqan issesini qayd etti. Hususan, I derece “Yararlıq içün” nişanınen Qırımtatar Milliy Meclisiniñ reisiniñ muavini İlmi Umerov taqdirlendi.

“Ukrayina ile olğanıñız içün minnetdarım. Devletimiz, Ukrayinanıñ mustaqilligi, aqlarımız ve topraq bütünligimiz içün küreşken er keske minnetdarım”, – dep Volodımır Zelenskıy qayd etti.

Qırımtatar Milliy Meclisiniñ reisi Refat Çubarov merasimde çıqışta bulunıp, bu qararnıñ emiyetini qayd etti:

“Ukrayina ükümetine, Mecliske temsil organınıñ uquqiy statusını berüv meselesiniñ çezilmesini acele temin etmesi vazifesini bergen Vesiqanıñ imzalanuvı, Ukrayina devleti öz mecburiyetlerini ardı-sıra yerine ketirecegini ve “Ukrayina tamır halqları aqqında” Ukrayina Qanunınıñ qaidelerini yerine ketirecegini tasdıqlay.

O qayd etti ki, Meclis tarihiy olaraq teşkil etilgen, demokratik şekilde saylanğan ve qırımtatar halqınıñ yekâne temsil organıdır:

“Qırımtatar halqı içün Meclis – sadece bir müessise degil. Halqnıñ iradesini ve öz tuvğan toprağında – Ukrayinanıñ ayırılmaz bir parçası olğan Qırımda saqlanuv ve inkişaf isteklerini aks etken qanuniy organdır”.

Refat Çubarov qırımtatar halqınıñ Qırımnen bağlı bütün esnaslarda iştirak etmesiniñ müimligini qayd etti:

“Ukrayina iştirak etmeden Ukrayina aqqında bir şey olmaz degen printsipnen tamamlanmalı: Ukrayina ve qırımtatar halqı iştirak etmeden Qırım aqqında bir şey olmaz”.

O şunı da qayd etti ki, Meclis Qırımğa nisbeten devlet siyasetiniñ şekillenmesi ve amelge keçirilmesiniñ bütün basamaqlarında iştirak etmeli.

Meclis reisiniñ aytqanına köre, qırımtatar halqınıñ temsilcileriniñ mukâfatlandırılması devletniñ olarnıñ azatlıq oğrunda küreşine qoşqan issesini tanığanınıñ işareti ola:

“Bu, olarnıñ öz halqınıñ aqları ve Ukrayina içün küreşinde zenaatkârlığı, printsipialligi ve yorulmazlığınıñ tanılmasıdır”.

Devlet mukâfatlarını alğanlar arasında:

– II dereceli “Yararlıqlar içün” nişanı – Akim Halimov.

– III dereceli “Yararlıqlar içün” nişanı – Mustafa Ametov, Arsen Cümadilov, Süleyman Mamutov, İrfan Mirzoev, Ayder Rustemov, Nariman Süleymanov, Lenur Temirov. Leniye Umerova.

– II dereceli knâginâ Olğa nişanı: Emine Emirsalieva.

– Ukrayina halq artisti: Cemil Karikov.

– Ukrayina halq ressamı: Rustem Skıbin.

– Ukrayinanıñ nam qazanğan ocaları: Gülnaz Acigeldiyeva, Afize Emiramzaeva.

– Ukrayina nam qazanğan jurnalisti: Naciye Ametova.

– Ukrayina nam qazanğan tasil hızmetçisi: Sabrie Slaston.

Qırımtatar Milliy Meclisi qayd ete ki, imzalanğan fermanlar Ukrayina tamır halqınıñ uquqiy statusınıñ qayd etilmesinde, Qırımğa nisbeten devlet siyasetiniñ quvetleştirilmesinde ve işğalden azat etilmesiniñ yaqınlaşmasında müim adım ola.

FOTO: © Press Service Of The President Of Ukraine / YPV.2026