Meclis vekilleri Qırım Muhtar Cumhuriyeti prokurorlığınıñ reberligi ile körüştiler

09.02.2026

Bugün, kiçik aynıñ 9-da, Qırım Muhtar Cumhuriyeti ve Aqyar şeeri prokurorlığında Qırımtatar Milliy Meclisiniñ reisi Refat Çubarov ve Qırımtatar Milliy Meclisiniñ azası, “Qırımtatar resurs merkezi” CTnıñ idare reisi Eskender Bariev ile Qırım Muhtar Cumhuriyeti ve Aqyar şeeri prokurorı Nariman Süleymanovnıñ körüşüvi olıp keçti.

Körüşüvde “Qırımtatar resurs merkezi”niñ adliyecisi Lüdmıla Korotkıh ve “Qırım strategik tedqiqatlar institutı” monitoring gruppasınıñ reisi Denıs Yaşnıy da iştirak ettiler.

Körüşüv vaqtında taraflar vaqtınca işğal etilgen Qırımnıñ şimdiki vaziyeti, insan aqları ve tamır qırımtatar halqınıñ aqlarını qorçalav oğrunda işbirlikniñ ilerideki yönelişlerini muzakere ettiler. Qırımnıñ işğalden azat etilmesi ve reintegratsiyası içün zarur olğan vazifelerge köre Ukrayina qanunlarını vaqtında mükemmelleştirmek müimligine ayrıca diqqat ayırıldı.

Körüşüv iştirakçileri devlet institutları, Qırımtatar Milliy Meclisi ve vatandaş cemiyeti arasında daimiy zenaat dialogınıñ müimligini qayd ettiler. Bu, işğal şaraitinde yapılğan cinayetlerge semereli cevap bermek ve Qırımnıñ işğalden azat etilmesi meselesini milliy ve halqara kün tertibinde saqlamaq içün kerek.

Ukrayina uquq qorçalayıcı organları tarafından qırımtatar halqınıñ sürgünligi cinayetiniñ genotsid aktı olaraq tahqiqatınıñ yekünlenmesi ve mahkemeniñ qararınıñ qabul etilmesiniñ müimligine ayrıca diqqat ayırıldı. Taraflar bu esnasnı tezleştirmek içün muayyen adımlarnı belgilediler.

Körüşüv iştirakçileri nazirlik ve müessiseler, uquq qorçalayıcı organlar, mahsus hızmetler, Ukrayina halq mebusları, Qırımtatar Milliy Meclisi ve cemaat teşkilâtlarınıñ temsilcileri ile tedbirlerniñ azırlanuvı ve keçirilmesiniñ zaruriyeti aqqında añlaştılar. Böyle tedbirlerniñ maqsadı Qırımnıñ Rusiye işğalcilerinden azat etilecek soñ reintegratsiyasınıñ qanuniy teminatı muzakere etilmek kerek.

Körüşüv vaqtınca işğal etilgen Qırımda insan aqları ve tamır qırımtatar halqınıñ aqlarını qorçalav meselelerinde işbirlik ve koordinatsiyanı terenleştirmek içün umumiy nazar noqtasını tasdıqladı.