Yetekçi Türkiye kütleviy haber vastalarınıñ vekilleri Qırımtatar Milliy Meclisiniñ ofisini ziyaret ettiler

16.07.2026

Bugün yetekçi Türkiye kütleviy haber vastalarınıñ vekilleri Qırımtatar Milliy Meclisiniñ ofisini ziyaret ettiler. Olarnıñ arasında TRT Haber, TRT World, CNN Türk, NTV, A Haber, Habertürk TV, TV100, 24 TV telekanallarınıñ jurnalistleri, GDH Digital ve GZT media platformalarınıñ jurnalistleri kirdi.

Türkiye Cumhuriyeti Tış işler nazirligi ve Ukrayinadaki Türkiye Cumhuriyeti elçihanesiniñ temsilcileri vekillerni ozğardılar.

Qırımtatar halqınıñ lideri Mustafa Cemilev ve Qırımtatar Milliy Meclisiniñ Reisi Refat Çubarov Türkiye matbuat vastalarınıñ vekillerinen subetleştiler.

Körüşüv vaqtınca işğal etilgen Qırım yarımadasındaki havfsızlıq ve gumanitar vaziyet, insan aqlarınıñ muntazam bozuluvı, qırımtatarlarnıñ taqip etilüvi ve işğalli Rusiye akimiyeti tarafından Meclisniñ faaliyetiniñ yasaq etilüvi, em de Qırımnıñ işğalden azat etilmesi ve Ukrayinanıñ topraq bütünliginiñ ğayrıdan tiklenmesi içün halqara ğayretler aqqında söz yürsetildi.

Çoqusı qırımtatar olğan siyasiy mabüslerniñ, şu cümleden, qadınlar, esli-başlılar ve ağır hastalıqları olğan şahıslarnıñ vaziyetine ayrı diqqat ayırıldı. Mustafa Cemilev ve Refat Çubarov Türkiyeniñ ilerideki destegi, hususan Rusiye tarafından qanunsız tutulğan Ukrayina vatandaşlarını azat etüv meselesinde, müim olğanını qayd ettiler.

Sualler ve cevaplar sessiyası vaqtında jurnalistler yarımadada Rusiye müstemleke siyaseti neticesinde olğan demografik deñişmeler, Rusiye tarafından Qırımtatar Milliy Meclisiniñ reberleri ve azalarınıñ taqip etilmesi, Rusiye işğali başlanğan soñ Qırımnı terk etmege mecbur olğan qırımtatarlarğa Türkiyeniñ qol tutuvı ve Qırımnıñ azat etilecek soñ kelecegi aqqında suallerni köterdiler.

Suallerge cevap bergende, spikerler qayd ettiler ki, Rusiye işğal etilgen Qırımnı, vatandaşlarnıñ ihtiyaclarını körmemezlikke urıp, ilk evelâ arbiy alan olaraq qullana. Olarnıñ qayd etkenlerine köre, yarımadanıñ arbiyleştirilüvi gumanitar buhran telükesi doğura ve sakinleriniñ havfsızlığını temin etmek içün yekâne yol – Qırımnıñ işğalden azat etilmesi ola.

Qayd etilgenine köre, yarımada işğalden azat eticek soñ onıñ kelecegi Ukrayina Anayasasına binaen ve qırımtatar halqınıñ Ukrayina tamır halqı olaraq aqlarını köz ögüne alıp belgilenmeli. 2014 senesi Rusiye işğalinden evel olğan modelge qaytuv qabul etilmez, Qırımnıñ reintegratsiyası esnası adalet, uquq üstünligi ve tamır halqlarınıñ aq-uquqlarınıñ kefaleti esaslarına esaslanmalı, dep qayd etildi.

Türkiye diñleyicileri içün bu körüşüv vaqtınca işğal etilgen Qırımdaki vaziyet, qırımtatar halqınıñ aqları oğrunda küreşi ve işğalden azat etilecek Qırımnıñ kelecegi aqqında obyektiv malümatnı yetkizmek içün daa bir fırsat oldı.