Ocalar künü – ocalar içün halqara seminar

09 Oktâbr 2012

Qırım Yuqarı Şurasınıñ deputatı, Milliy Meclis medeniyet ve tasil idaresiniñ reberi Safure Kacametovanıñ teşebbüsinen milliy ve oqutuv eki-üç tilde alıp barılğan mekteplerde çalışqan tasil hadimleri içün Qarasubazar şeeriniñ 4-nci mektebi esasında  “Mekteplerde interaktiv usulları” mevzusında 2 künlik halqara seminar ötkerildi. 

Seminar Çehiya Halqara meseleler boyunca Assotsiatsiyası ve „Maarifçi” Assotsiatsiyasınıñ işbirliginde alıp barıldı.

Çehiya “Halqara leyhalar” teşkilâtınıñ koordinatorı Zdenka Vagnerova ve onıñ yardımcıları Valentina Lülâ, İosef Marts ve Martsel Magdam Qarasuvbazar rayonında oqutuv qırımtatar tilinde ve eki-üç tilde alıp barılğan mekteplerde çalışqan ocalarğa 2 kün devamında “Derslerde video materiallarnı qullanuv”, “Eñ güzel derslik nasıl olmalı”, “Oqutuvda etraftaki manzaranıñ fenomeni” ve diger meraqlı mevzular boyunca interaktiv usullarnı ögrettiler. Olarnıñ lektsiyalarını diñlegen ve amelde interaktiv usullarnı işletmek yollarınen tanışqan  qırımtatar ocaları da öz tecribelerinen paylaştılar.

Seminarda iştirak etken 25 tasil hadimi “Mekteplerde interaktiv usulları” halqara seminarda bulunıp, öz bilgilerini arttırğanlarını  memnünliknen qayd etti ve derslerinde bu yañı usullarnı işleteceklerini bildirdi.

Milliy mektep müdirleri Lenure Mujdabayeva, Redife İlyasova ve olarnıñ muavinleri mezkür seminarda baqılğan usullar mekteplerniñ pedagogik keñeşlerinde muzakere etilecegini ve seminarda iştirak etip olamağan diger ocalar arasında da ögrenilecegini işandırdılar.

QYUŞ deputatı, Milliy Meclis medeniyet ve tasil idaresiniñ reberi, “Maarifçi” birleşmesiniñ reisi  Safure Kacametova Çehiya “Halqara leyhalar” teşkilâtınıñ koordinatorı Zdenka Vagnerovağa,  onıñ yardımcılarına ve seminar içün mesül teşkilâtçı Nadilâ Asanovağa teşekkür bildirip, Fahriy yarlıqlar ve qıymetli ediyelernen taqdirledi.