Kıyivde Mustafa Cemilev ve Refat Çubarov Türkiye kütleviy haber vastalarınıñ vekillerinen körüştiler

19.05.2026

Qırımtatar halqınıñ lideri Mustafa Cemilev ve Meclis Reisi Refat Çubarov Ukrayinada bulunğan Türkiye kütleviy haber vastalarınıñ vekillerinen körüştiler.

Körüşüvde Anadolu Ajansı (AA), Demirören Haber Ajansı (DHA), ANKA Haber Ajansı, TRT Haber, A Haber, CNN Türk ve Habertürk TVniñ yetekçi haber agentlikleri ve telekanallarınıñ jurnalistleri iştirak ettiler.

Subet devamında Mustafa Cemilev ve Refat Çubarov Türkiye jurnalistlerine vaqtınca işğal etilgen Qırımdaki vaziyetni, hususan qırımtatar halqına qarşı yapılğan taqip ve repressiyalar, ruslaştıruv siyaseti, demografik deñişmeler ve yarımadadan qırımtatarlarnıñ mecburiy çıqışınıñ yañı dalğasını doğurğan mecburiy askerlikke kütleviy çağıruvnı añlattılar.

Mustafa Cemilev ve Refat Çubarov Türkiye jurnalistleriniñ bir çoq sualine cevap berdiler. Hususan, cenkni toqtatmaq içün halqara ğayretleri ve barışıq esnasında Türkiyeniñ rolü aqqında. Mustafa Cemilev şunı qayd etti ki, adaletli barışıqnıñ şartı – Ukrayinanıñ bütün topraqlarınıñ bütünley işğalden azat etilmesidir, Qırımnıñ işğalden azat etilmesi ise – qırımtatar halqınıñ yaşayış meselesidir.

Bundan ğayrı, işğal etilgen Qırımda qırımtatar ve ukrayin tasiliniñ vaziyeti, genç nesilge rus teşviqatınıñ tesiri ve milliy kimlikni saqlavda qorantanıñ rolü aqqında da söz yürsetildi.

Qırım siyasiy mabüsleri meselesi ve olarnı deñiştirüv cedvellerine kirsetüv meselesi ayrı subet mevzusı oldı. Mustafa Cemilev qayd etti ki, Türkiye Rusiye ögünde qırımtatarlarnıñ aqlarını qorçalav ve siyasiy mabüslerni azat etüv meselesini kötere bilecek az sayılı devletlerden biridir.

Qırımtatar halqınıñ liderleri, faal Rusiye teşviqatı şaraitinde Türkiye kütleviy haber vastaları tarafından Ukrayinada ve Qırımda olıp keçken vaqialarnı obyektiv şekilde aydınlatmaq müimligini qayd ettiler.