Mustafa Cemilev: Qırımda Dünya Etik Forumı qırımtatarlarnıñ aqsımlanğanını obyektiv kösterir

04 Iyün 2013

2013 senesi iyün 3 künü Milliy Meclis reisi Mustafa Cemilev Dünya Etik Forumı Halqara teşkiliy komitetiniñ “Barışıqlıq medeniyet vastasınen” Halqara Birleşme Avropa Federatsiyasınıñ prezidenti Vilgelm Augustat yolbaşçılığındaki .delegatsiyası ile körüşti. Milliy Meclisni körüşüvde bunıñ kibi de tışqı alâqalar bölüginiñ başı Ali Hamzin temsil etti.

Körüşüv devamında delegatsiya vekilleri Meclis reisine 2014 senesi Qırımda Dünya Etik Forumını azırlav ve ötkerüv teşebbüsiniñ kerçekleşmesine yardımcı olması ricasınen muracaat ettiler. Bundan da ğayrı musafirler Meclis Forumda seslendirmek istegen meselelerniñ cedvelini bermek, Qırım yarımadasındaki vaziyetni tarif etmek teklifinde bulundılar.

“Yigirmi yıldan berli “Barışıqlıq medeniyet vastasınen” Halqara Birleşmesi 85 ülkedeki meslekdeşleri ile birlikte medeniyet vastasınen dünya ideallarını pekitmek işinen oğraşa, – dep añlattı “Barışıqlıq medeniyet vastasınen” Halqara Birleşme Avropa Federatsiyasınıñ prezidenti Vilgelm Augustat Mustafa Cemilevge hıtap eterek. – Biz sağlıq, medeniyet ve ahlâq mevzularında Qırım, Qazahistan, Çeçenistan, Litva, İndstan ve Rusiyede konferentsiyalar keçirdik. Qırımda Dünya Etik Forumını keçirmekni arzu eterek, siziñ qoltutuvıñızğa muhtacmız”.

Musafirlerniñ çıqışlarından soñ Meclis reisi Mustafa Cemilev qırımtatarlarnıñ tarihı, sürgünlik, milliy akimiyet institutları ve halqnıñ Qırım ve Ukrainada aqsımlanğanı, onıñ qanuniy aqları bozulğanı aqqında ikâye etti.

“Qırımnıñ tarihı ğayet dramatik ve feciydir, – dep qayd etti Mustafa Cemilev. – Öyle oldı ki bu yarımadada bir çoq din ve medeniyetler yan-yanaşa yaşaylar. “Barışıqlıq medeniyet vastasınen” Halqara Birleşmesi keçirgen konferentsiya mevzuları Qırım içün de müimdir. Zanımca, siz tam zamanında keldiñiz. Milletlerara ve dinlerara munasebetler ğayet mürekkep bir alda. Em sebep dinlerniñ farqlılığanda degil, bazı siyasetçilerniñ insanlarnıñ diniy duyğularını qozğamaqtadır”.

Mustafa Cemilev qırımtatar halqı milletlerara barışıqlıqnıñ, yarımadada epsi din mensüpleriniñ aqları qorçalanmasınıñ tarafdarıdır. Amma İslâm dinini kütken qırımtatarlarnıñ kendileri öz diniy duyğularına sayğısızlıq kösterilgenini köreler, dep qayd etti.

M.Cemilevniñ söylegenine köre Meclis Dünya Etik Forumına bir şartnen qatılır. Bu şart da Forum işiniñ neticelerine köre halqara teşkilâtlar, Ukrainanıñ devlet ve cumhuriyet organlarına qırımtatarlarnıñ kerçek vaziyetini añlatqan muracaatlar yollamaqtır.

Körüşüvniñ soñunda delegatsiya vekilleri körüşüv ve 2014 segnesi Qırımda Dünya Etik Forumını keçirüıv teşebbüsine qoltutqanı içün Mustafa Cemilevge teşekkür bildirdiler.