Mustafa Cemilev Canköy rayonınınıñ Qalay qasabası ve Canköy şeerinde yaşağan semetdeşlerimiznen körüşti

22 Oktâbr 2012

2012 senesi oktâbr 20 künü Qırımtatar halqı Meclisiniñ reisi, Ukraina halq deputatı Mustafa Cemilev Canköy rayonınıñ Qalay qasabasında ve Canköy şeerinde yaşağan semetdeşlerimiznen körüşti.

Qalay qasabasında Meclis reisi Mustafa Cemilevnen körüşüvge 200-den ziyade adam toplandı, Canköy şeerinde de Meclis yolbaşçılarını rıqnen tolu salon qarşıladı. . Qalay qasabasında ve Canköy şeerinde körüşüvlerde №3 saylav dairesi boyunca Ukraina halq deputatlığına mustaqil namzet Vladimir Şklâr iştirak etti.

Meclis reisi yerli sakinlerge oktâbr 28-de Ukrainada halq deputatlarını saylavlar olacağı ve olarnıñ neticesine köre devlet parlamentiniñ yañı erkânı – Ukraina Yuqarı Şurası şekillenecegini hatırlattı.

“Bu munasebetnen 2012 senesi iyül 21-22 künleri olıp keçken Qırımtatar halqı 5-nci çağırılış qurultayınıñ 4-nci sessiyasında Qurultay delegatları “Ukraina halq deputatlarını saylav ve qırımtatar halqı öz-özüni idare etüv milliy organlarınıñ vazifeleri aqqında Qurultay qararı”nı qabul ettiler, – dedi Meclisniñ başı. – Şu qararğa binaen oktâbr 28-deki saylavlarda qırımtatarlarnıñ bir pozitsiyası boyunca kelişilip, alınğan qarar qırımtatar halqı öz-özüni idare etüv milliy organlarınıñ tarafından eda etilmesi belgilendi”.

Bundan da ğayrı, Mustafa Cemilev qayd etti ki, 2012 senesi iyül 27-de “Batkіvşçina” Birleşken muhalifet ve Qırımtatar halqınıñ Meclisi Yuqarı Şurağa saylavlarda iştirak etüvge dair müşterek beyanatnı imzalap, 7-nci çağırılış Ukraina Yuqarı Şurasında Birleşken muhalifet cedvelinden saylanğan deputatlar vastasınen işbirlik aqqında añlaştılar. №3 saylav dairesi boyunca Ukraina halq deputatlığına mustaqil namzet Vladimir Şklâr aqqında aytırken Meclis başqanı Mustafa Cemilev V. Şklârnıñ Ukraina parlamentinde çalışuv tecribesi olğanı ve özüni namuslı, mesülietli professional olaraq köstergenini söyledi. “2002 senesi o Qırımdaki №8 majoritar daire boyunca ğalebe qazanıp, Ukraina halq deputatı vazifesinde agrar siyaset ve topraq meselelerinen faal oğraştı”, – dep qayd etti M. Cemilev.

“Bugün Ukraina halq deputatlığına mustaqil namzet Vladimir Şklârğa qoltutar ekensiñiz, bir çoq müim problemleriñizniñ çeziminde işançlı yardımcını peyda etersiz”, – dedi M. Cemilev semetdeşlerimizge hıtap eterek.

Soñki devir içinde Vladimir Şklâr Qurman ve Canköy rayon sakinlerinen keçirgen 200-den ziyade körüşüvlerde insanlar eñ çoq topraq ve işsizlik meseleleri boyunca muracaat ettiler.

“Men tişli namzetim ve Ukraina akimiyetiniñ qanunâratıcı organında tek çalışmaq isteyim”, – dedi Vladimir Şklâr Canköy rayon sakinleri ögünde yapqan çıqışında. V. Şklârnıñ aytqanına köre o, parlamentniñ agrar komitetinde faaliyetini devam ettirmek, köy hocalığını inkişaf ettirmek ve işsizlikni eksiltmek meselelerine ziyade diqqat ayırmaq niyetinde.