Mustafa Cemilev: « Azarov baş nazirliginiñ soñki ayında mantıqsız ve manasız şeylerni söyleyebilir»

19 Oktâbr 2012

Qırımtatar halqı Meclisiniñ reisi, Ukraina halq deputatı Mustafa Cemilev Nikolay Azarovnıñ qırımtarlarğa artıq kendiñizni sürgün etilgen halq demeñiz, degen çağıruvını saylavlar arfesinde Qırımdaki rus şovinistleri ögünde özüni köstermek içün yaptı, dep saya. “Elbetteki, biz – qırımtatarlarmız, – bizim milletimizniñ adı “sürgün etilgenler” degil.

Lâkin, Azarov imzalağan bücette “sürgün etilgen şahıslarnıñ yerleştirilmesinen bağlı masraflar” degen sıra bar. Baş nazir kendi imzalağan vesiqalarnı diqqat ile oquması lâzim”, – dedi Mustafa Cemilev. “Amma mesele şunda ki, Azarov teatrde hususiy bir seyircilerni topladı. Saylavlar ögünden özüni begendirmek istedi.

Mındaki saylavcılarnıñ ekseriyeti şovinistlerce davranğan kimseler oldığı içün onıñ sözleri elçırpmalar ile qarşılandı. Zaten, Azarov baş nazir olaraq soñki ay çalışmaqta, şunıñ içün de şöyle saçma-sapan sözlerni söyledi”, – qayd etti Meclis başqanı.


Hatırlatamız ki, 2012 senesi oktâbr 18 künü Qırımda bulunğan Ukraina Baş naziri Nikolay Azarov salonda oturğanlardan birisiniñ oña berilgen sürgün etilgenlerniñ qaytması ve yerleşmesi içün devlet programmasından ayırılğan sermiyalar aqqındaki sualge qırımtatarlar artıq kendilerini sürgün etilgenler demesin, dedi.

“Aydıñız, siz artıq özüñizni sürgün etilgenler deybermeñiz, – dedi baş nazir. – Siz bizim ealimiz içine siñip, onıñ bir qısmı olduñız”. Teatr salonında elçırpmalar yañğıradı. Azarovnıñ söylegenine köre ükümet sovetler devrinde zarar körgen qırımtatarlarnıñ ve diger halqlarnıñ meselelerini çezip keldi ve ileride de çezecek.