Milliy mekteplerde Qurban Bayramı!

25 Oktâbr 2012

Er yılı kibi bu sene de Milliy Meclis medeniyet ve tasil idaresiniñ yolbaşçısı, “Maarifçi” birleşmesiniñ reisi Safure Kacametova milliy mekteplerimizge qurbanlar teşkilâtlandırdı. Onıñ sayesinde bütün milliy mekteplerimizde qurbanlar çalınıp, bayram merasimleri ocalar, talebeler, ana-babalar ve cemaatçılıqnıñ iştirağında keçirildi.

Bahçasaraydaki hanlar sarayında yerleşken qadimiy camide bayram namazını qılğan Milliy Meclis reisi Mustafa Cemilev Qırımğa kelgen sayğılı musafirlernen milliy mektepke teşrif buyurdı.

İlk qurbanlar oktâbr 25 künü Bahçasaray şeerindeki, Alma-Tarhan köyündeki ve Aqmescit bölgesiniñ Bulğanak köyündeki milliy mekteplerde çalındı.

AQŞ dan milliy mekteplerimizge qurbanlar ketirgen Necet efendi Tabaruh bu qurbanlar milleti ve Vatanına hızmet yolunda şeit ketken ulu insanlarımız İ.Gaspıralı, Noman Çelebicihan, Cafer Seydametlerniñ ruhundan em de bugünki künde halqımıznıñ lideri Mustafa Cemilev ve çoqtan- çoq çet elde yaşağan dindaşlarımıznıñ adından çalınacaq dep, er kezni Qurban bayramınen hayırladı.

Necet efendiniñ ricası ile bu insanlarnıñ adlarını seslendirgen Mustafa Cemilev, milletimizge yardım qolunı uzatqan er kimge teşekkür bildirdi. Qurban çaluv merasımına Bahçasaray RD memuriyetiniñ başı İlmi Ümerov, regional meclisiniñ reisi Ahtem Çiygoz yerli din cemiyetiniñ azaları ve cemaatçılıq qoşuldı.

Soñra Necet efendi Alma-Tarhan milliy mektebine davet etildi. Bu mektepte onı beklegen oca ve talebeler qurban tedbirine kontsert programmasınıda kirsetkenler. Balalar icrasında ilâhiyler musafirni ğayet quvandırdı.

AQŞ dan yollanılğan qurban Aqmescit rayonı Bulğanaq köyündeki milliy mektepte de şu künü çalındı. Mektep müdiri Üsniye Asanova, ocalar ve yerli cemaatçılıq adından AQŞ da ve Türkiyede yaşağan ve mekteplerge qurban bağışlağan dindaşlarımızğa samimiy minnetdarlığını bildirdi.

İş bu tedbirlerni teşkil etken “Maarifçi” birleşmesiniñ reisi Safure Kacametovanıñ aytqanına köre, Necat efendiniñ qoltutuvında 13 milliy mekteplerde tana qurbanlar çalındı, Eski-Şeher qırımtatar Derneginiñ reisi Mesut Ornıñ yardımında 3 eki tilde oqutqan mekteplerde tana qurban çalındı ve Bütünukrain “Alraid” birleşmesiniñ Qırımdaki bölüginiñ reisi Mohammad Tahanıñ qoltutuvında milliy sınıfları bar 14 rus tilli mekteplerge – kesilgen qoy qurban bağışlandı.

Bu hayırsever insanlardan Allah razı olsun!