Türkiye Tış işleri naziriniñ muavini Ayşe Berris Ekinci Meclisni ziyaret etti

14.05.2026

Mayıs ayınıñ 14-nde Türkiye Tış işleri naziriniñ muavini Ayşe Berris Ekinci Ukrayinağa iş ziyareti çerçivesinde kelip, Qırımtatar Milliy Meclisininiñ Kıyiv şeerindeki ofisini de ziyaret etti. Ürmetli musafirnen beraber Ukrayinadaki Türkiye Elçisi Mustafa Levent Bilgen bar edi.

Olıp keçken körüşüvde qırımtatar halqınıñ lideri Mustafa Cemilev, Qırımtatar Milliy Meclisiniñ Reisi Refat Çubarov, Meclis Reisiniñ muavini İmli Umerov, Meclis azaları Eskender Bariyev, Riza Şevkiyev, Gülnara Bekirova, Qırım musulmanları diniy idaresiniñ müftisi Ayder Rustemov, Qırım Milliy varlıq fondunıñ reisi Lenur Mambetov ve Ukrayinanın arap ve musulman devletlerinen munasebetleri meseleleri mesleat şurasınıñ kâtibi Snaver Seithalilev iştirak ettiler.

Bu, Ayşe Ekinciniñ Meclis reberliginen ekinci körüşüvi edi. Evelki subet, bu sene çiçek ayında Antaliya dimplomatik forumı çerçivesinde oldı, anda taraflar Türkiye vekilleriniñ Kıyiv şeerine seyaatı vaqtında subet etmege devam etmege añlaştılar.

Körüşüvniñ esas mevzularından biri Qırım siyasiy mabüsleri meselesi ve işğal etilgen Qırımdaki insan aqları vaziyeti oldı. Meclis vekilleri,  çoqusı qırımtatar olğan ve qanunsız şekilde tutulğan siyasiy mabüslerni azat etmek içün halqara ğayertlerni köstermege devam etmek kerekligini qayd ettiler.

Qırımtatar Milliy Meclisiniñ vekilleri Cian qırımtatarlar kongressiniñ keçirilmesinen bağlı meselelerge ayrıca diqqat ayırdılar.

Bu meseleniñ muzakere etilmesinin sebebi şu ki, eñ büyük qırımtatar diasporası Türkiyede yaşay. rusiye-Ukrayin cenki şaraitinde tamam Türkiye toprağında bütün dünyadan qırımtatar diasporalarınıñ vekilleriniñ kelecekleri büyük tedbirniñ keçirilmesini temin etmek mümkün.

Körüşüv vaqtında Qırımtatar Milliy Meclisiniñ vekilleri, Ukrayinağa qol tutumaq ve qırımtatar halqını qorçalamaq içün halqara cemaatnıñ, şu cümleden türk ve islam dünyasınen birleştirilmesine yardım ete bilgen bir qaç teklif çıqardılar.

Körüşüvniñ neticelerini çıqarıp, Refat Çubarov şunı qayd etti:

«Biz, muzakere etilgen meseleler ve Türkiye tarafınıñ nazar noqtasından memnünmiz. Ümüt etemiz ki, Türkiye Tış işleri nazirliginen muzakere etilgen yönelişlerdeki bizim kelecek işdeşligimiz quvetleştirilecek».

Meclis Reisi qayd etti ki, taraflar Rusiyeniñ tolu miqyaslı tecavuzından evel Türkiyeniñ Ukrayinada başlatqanı leyhalarnı devam ettirmek kerekligine ayrıca diqqat ettiler. Şu cümleden, Türkiye işdeşlik ve idarecilik agentliginiñ (TİKA) desteginen keçirilgen ve tolu miqyaslı tecavuz sebebinden toqtatılğan tasil, maarif ve medeniyet teşebbüsleri aqqında söz yürsetile.

Bundan ğaytı, Refat Çubarov, işğalden azat etilecek Qırımnıñ reintegratsiyasına yönelgen büyük içtimaiy, iqtisadiy ve gumanitra leyhalarnı vaqtında azırlap yerine ketirmek müimligini qayd etti.