Meclisniñ toplaşuvında Ukraina Yuqarı Şurasına saylavlar neticesi baqılıp, Aqyarda regional konferentsiya keçirüvniñ künü belgilendi

12 Noyabr 2012

Regional konferentsiya Aqyarda 2012 senesi noyabr 24-te olacaq

Böyle qarar Qırımtatar halqı Meclisiniñ Aqmescitte 2012 senesi noyabr 12-de olıp keçken nevbetteki toplaşuvında alındı.

Yerli meclislerge saylavlarnı teşkilâtlandıruv ve azırlav boyunca komissiyanıñ kâtibi Zair Smedlâyev bildirgenine köre, 20 oktâbr künü Aqyar regionında yerli meclislerge saylavlar keçirildi. Böyleliknen endi Qırımnıñ deyerlik bütün regionlarında qırımtatarlarnıñ öz-özüni idare etüv organlarına saylavlar yekünlendi.

Meclis azaları “Qırımtatarlarnıñ öz-özüni idare etüv organlarına saylavlar nizamnamesi”ne muvafıq Aqyarda regional konferentsiyanı noyabr 24 künü keçirmek qararını aldılar.

“Konferentsiyada Aqyar regional meclis reisi ve regional meclis erkânı tasdiqlanacaq”, dep qayd etti Z. Smedlâyev.

Bundan da ğayrı Meclis azaları Meclis Kâtibiyetiniñ başı Zair Smedlâyevniñ halq deputatlarını saylav neticeleri boyunca esabatını diñlediler. Belli ki, oktâbr 28-de Ukraina parlamentine ötkerilgen saylavlarda Meclisnen añlaşılğanı alda Ahtem Çiygoz (10-ncı daire) ve Eskender Bariyev (8-nci daire) iştirak ettiler. Çiygoz ve Bariyev Parlamentke saylanmasalar da, ekisi de öz dairelerinde ekinci yerni qazanıp, faal işleri sayesinde yüksek neticelerni elde ettiler.

Qırımtatar halqı Qurultayı delegatlarını saylav boyunca merkeziy saylav komissiyası tarafından teklif etilgen “Qırımtatar halqı Qurultayı delegatlarını saylav nizamnamesi” leyhasını muzakere etüv devamında Meclis azaları “Qurultay delegatlarını saylav aqqında nizam” leyhasını daa işlemek içün işçi gruppanı meydanğa ketirmek qararını aldılar.

İşçi gruppağa ğayrıdan işlengen leyhanı Meclisniñ muzakeresine 2012 senesi noyabr 25-ke qadar taqdim etmek vazifesi berildi.

Toplaşuvnıñ çeşit meseleler bölüginde ise Meclisniñ Topraq komissiyası reisi Zevcet Qurtümerov qırımtatarlarğa topraq ayıruvnıñ vaziyeti aqqında ayttı.