Menu

Meclisniñ prezidiumınıñ 2024 s. Olimpiya oyunlarında rus ve belarus sportçularınıñ iştirak etmemeleri aqqında arizası

28 Mart 2023
Meclisniñ prezidiumınıñ 2024 s. Olimpiya oyunlarında rus ve belarus sportçularınıñ iştirak etmemeleri aqqında arizası

Qırımtatar Milliy Meclisiniñ

Prezidiumınıñ

2024. Olimpiya oyunlarında

rus ve belarus sportçularınıñ etmemeleri 

aqqında arizası

Olimpiyalıqnıñ esas printsiplerini ve eñ müin qıymetlerini tesbit etken Olimpiya hartiyası, açıq aydın tarzda köstere ki, Olimpiyalıqnıñ maqsadı – “insanlıqnıñ aenkli inkişafına yönelgen ve insan qıymetini saqlamağa ıntılğan barışıqsever cemaatnı terbiyelemege yardım etken sport türüdir”.

Yazıq ki, em de XXI asırda bozulğan demokratiyanen ve diktator rejiminen devletler, beş qıtanı birleşken Olimpiyalıqnıñ qıymetleri esasında yekâbe körüniş ve universal faaliyet olaraq Olimpiya areketine viranelik ücümlerini yapmağa devam eteler.

Bunıñ içün Qırımtatar Milliy Meclisi, 2014 senesi kiçik ayda mustaqil Ukrainağa qarşı cen başlatqan ve onıñ neticesinde Qırımnı ve Ukrainanıñ başqa topraqlarını işğal etken, Ukrainanıñ on biñlerce tınç yaşağan sakinini ve askerini öldürgen, yüzlerce şeeri, qasabası ve köyüni viran etken, millionlarca vatandaşını qaçaq olmağa ve köçmege mecbur etken tecavuzcı bir devlet olaraq Rusiyeniñ Olimpiya areketini itibardan tüşürmege ve yoq etmege muntazam ıntıluvlarını çorlana.

Qırımtatar Milliy Meclisi qayd ete ki, Belarusta akimiyetni zapt etken Lukaşenkonıñ diktator rejiminiñ, Olimpiyalıqnıñ qıymetleri ve printsiplerine dair aynı utanmazca nazar noqtası bar.

Qırımtatar Milliy Meclisi, Halqara olimpiya eyyetiniñ (HOE) 2024 senesi Olimpiya oyunlarında Rusiye ve Belarusnıñ milliy olimpiya eyyetlerine iştirak etmege yasaqlanuv aqqında qararını destek ere.

Faqat, Qırımtatar Milliy Meclisi, Halqara olimpiya eyyetiniñ (HOE) 2024 senesi Parijdeki Olimpiya oyunlarında bitaraf bayraqnen rus ve belarus sportçularına iştirak etmege yasaqlanuv aqqında qararınen tamamınen razı olmay.

Halqara uquq añlata ki, vatandaşlıq – ayrı şahıs ve devlet ile uquqiy qarşılıqlı munasebettir. 2014 senesi kiçik ayda Rusiyeniñ başlatqanı rus-ukrain cenkinen bağlı vaziyetke köre, eger Rusiye vatandaşı bu cenkke qarşı iç bir areket etmese, rus ordusınıñ Ukrainanıñ topraqlarında yapqanı cenk cinayetlerini takbih etmese, Qırımnıñ rus işğaline qarşı çıqmasa, bu insannıñ menfaatı – Kremlniñ cinaiy menfaatından farqlanmaz. Bunıñ içün Olimpiadda rus sportçularına er bir menfaatnen iştirak etmege izin berüv demek ki, Halqara olimpiy eyyeti (HOE), rus tecavuzcısınıñ Ukrainada cinayetlerini (şu cümleden çoqlaşqan tamır qırımtatar halqını taqip etüvler) destek ete.

Qırımtatar Milliy Meclisi qayd ete ki, ukrain ve qırımtatar halqlarınıñ genotsidi ve Ukrainanıñ topraqlarını işğal etmege aqlamaq içün Rusiye ve Belarusnıñ diktator rejimleri, 2024 senesi Olimpiya oyunlarında ya da Olimpiada çerçivsinde keçirilecek başqa tedbirlerde rus ve belarus sportçularınıñ iştirakini qullanacaq.

Qırımtatar Milliy Meclisiniñ prezidiumı, Halqara olimpiya eyyetiniñ (HOE) İcra Eyyetini 2024 senesi Olimpiya oyunlarına er bir menfaatnen rus ve belarus sportçularına iştirak etmege yasaqlamaq içün qarar bermege ve 2024 senesi Olimpiadanıñ bütün iştirakçilerini, Qırımda Olimpiya hartlarını bozğan ve Olimpiyalıqnıñ esas printsipleri ve eñ müim qıymetlerini yoq etken tecavuz aktlarını destek etüvler, mustaqil devletlerniñ topraqlarını işğal etmege ıntıluvlar, ırq ayırımları ve taqiplerine dair diqqatnen teşkermege çağıra.

Qırımtatar Milliy Meclisiniñ 

Başı Refat Çubarov

2023 senesi saban ayınıñ 28-i

Kıyiv ş.