Meclis reisi Mustafa Cemilev Şimaliy Qıbrız Türkiye Cumhuriyetiniñ Mustaqillik künü tantanasında iştirak etti

15 Noyabr 2012

2012 senesi noyabr 15 kününden Şimaliy Qıbrız Türkiye Cumhuriyetiniñ Mustaqilligi ilân etilgeniniñ 29 yıllığı munasebetinen tantanalı tedbirler keçirilmekte.

Meclis reisi Mustafa Cemilev Şimaliy Qıbrız Türkiye Cumhuriyetiniñ Mustaqillik künü tantanasında iştirak etmek içün Qıbrızğa ketti.

Ziyareti çerçivesinde Mustafa Cemilev Şimaliy Qıbrız Türkiye Cumhuriyetiniñ prezidenti Derviş Eroğlu ve Cumhuriyet Parlamentiniñ reisi Hasan Bözer ile körüşip, Cumhuriyet Mustaqilliginiñ 29 yıllığına bağışlanğan tantanalı numayışta iştirak etti.

Meclis reisinen beraber tantanalı merasimlerde Qırım Halqara Biznes birligi Yatırımlar ve halqara ticaret komitetiniñ başı Rustem Ümerov da qatıldı.

Malümat içün:  Şimaliy Qıbrız Türkiye Cumhuriyeti Qıbrız adasınıñ şimaliy qısmında yerleşken devlet. 1975 senesinden 1983 senesine qadar Şimaliy Qıbrız Türkiye Federativ Cumhuriyeti adını taşıdı.

1983 senesi Şimaliy Qıbrız öz mustaqilligi aqqında ilân etti. Yañı devletniñ adı Şimaliy Qıbrız Türkiye Cumhuriyeti olıp, onıñ birinci prezidenti Rauf Denktaş oldı.