Meclis reisi Mustafa Cemilev Qalay medresesini ziyaret etti

22 Oktâbr 2012

2012 senesi oktâbr 20 künü Meclis reisi, Ukraina halq deputatı Mustafa Cemilev Canköy rayonı Qalay qasabasına iş seferi çerçivesinde semetdeşlerimiznen körüşti ve Qalay medresesini ziyaret etti.

Medresede Mustafa Cemilev oquv ceryanı ile tanış olıp, oca ve sohtalarnen subetleşti. Milliy Meclis reisinen beraber medresede Meclis azası Ruslan Qurtseitov, Canköy regional meclis reisi Rustem Ennanov, Qalay yerli meclisniñ başı Anvar Ahmadaliyev ve “QIRIM” FONDI” hayriye teşkilâtınıñ baş direktorı Riza Şevqiyev da bulundılar.

Qalay medresesi direktorınıñ muavini İlimdar Cambazovnıñ bildirgenine köre Qalaydaki erkekler medresesi 1998 senesi açılıp, onda diniy ve mektep fenleri ögretile.

“Medresege subetleşüv esasında imtiansız qabul etemiz. Qalay erkek ve qadınlar medresesine 8-nci sınıfnı bitirgen ve bundan büyük yaşta olğan yigit ve qızlar qabul olunalar. Mektep fenlerinden qomşu köydeki milliy mektep ocaları ders bereler. Medresede oquv müddeti ise 3 yıl”, – dedi İ. Cambazov.

Qalay medresesi direktorınıñ muavini Meclis reisine medrese talebeleri yaşağan 80 insanğa qararlaştırılğan yataqhaneni kösterdi. “Derslerni aliy diniy malümat saibi olğan ocalar alıp baralar. Sınıf odalarında bütün şaraitler mevcut. Talebeler 3 kere aş, şu cümleden milliy yemeklernen, temin etileler.

Medresede oquv, yataqhanede yaşav ve aş bedava, – ikâye etti İ. Cambazov. Medreseni kezingen Mustafa Cemilev bunıñ kibi de oquv odalarında, bilgisayar sınıfında bulunıp, oquv ceryanınıñ istiqballeri hususında fikirlerinen paylaştı.

Medrese yolbaşçılarınıñ bergen malümatlarına köre 1998-2011 seneleri zarfında Medresege oqumağa kirgen 2500 talebeden 182 neferi oquvnı muvafaqiyetli tamamlap, Şeadetnameler alğanlar. Al-azırda Medrese mezunları Qırımnıñ çeşit köy ve qasabalarında imam olaraq çalışalar, 13 talebe ise Türkiye universitetlerindeki İlâhiyet fakultetlerinde oquvnı devam ettilereler.