Meclis reisi Eski Qırım ve Kefe sakinlerinen körüşti

22 Oktâbr 2012

Regional ve yerli meclislerniñ faal qoltutuvında ötkerilgen bu körüşüvlerde Meclis reisi Mustafa Cemilev, onıñ muavini, Qırım Yuqarı Şurasında “Qurultay-Ruh” fraktsiyasınıñ başı Refat Çubarov, Meclis reisiniñ muavini Remzi İlyasov, Bağçasaray regional meclis reisi, Ukraina halq deputatlığına №10 saylav dairesinden namzet Ahtem Çiygoz. Meclis azaları ve “Batkіvşçina” Birleşken Muhalifet vekilleri iştirak eteler.

2012 senesi oktâbr 21-de Milliy Meclis reisi, Ukraina halq deputatı Mustafa Cemilev Eski Qırım ve Kefe sakinlerinen körüşti. Körüşüvde Kefe regional meclis reisi İbraim Murasov, Eski Qırım şeer meclisiniñ reisi Dilâver İsmailov, bunıñ kibi de Ukraina halq deputatlığına №6 saylav dairesinden “Batkіvşçina” Birleşken Muhalifetten namzet Pötr Çörnıy de bulundı.

Meclis başqanı Mustafa Cemilev Ukraina halq deputatlarını saylavlarına bir afta qalğanı ve oktâbr 28 künü Ukraina vatandaşları parlamentniñ yañı erkânı içün rey bereceklerini qayd etti. Semetdeşlernen subetleşüv devamında Mustafa Cemilev Qırımtatar halqı 5-nci çağırılış qurultayınıñ 4-nci sessiyasında Ukraina halq deputatlarını saylavlarğa dair Qurultay qararını tekrar hatırlattı. Bundan da ğayrı Mustafa Cemilev şunı da qayd etti ki, Meclis ve Birleşken muhalifet 2012 senesi iyül 27-de Ukraina halq deputatlarını saylavda iştirak etüv boyunca Müşterek beyanat imzaladılar ve Yuqarı Şurada Birleşken muhalifet cedveline Meclis tarafından kirsetilgen deputatlar vastasınen işbirlik aqqında añlaştılar.

Semetdeşlerge hıtap eterek, Meclis reisi çoq mandatlı ve bir mandatlı saylav dairelerinde “Batkіvşçina” Birleşken muhalifetten kösterilgen namzetlerge qoltutuvda aktivlik ve birlikni köstermege çağırdı.

Şunı qayd etmeli ki, saylavaldı toplaşuvlarda insanlarnıñ faalligi aşağı seviyede olğanında siyasetçilerniñ kendileri de qabaatlılar, buña ağımdaki siyasiy vaziyet de tesirini köstermekte. Lâkin toplaşuvlarda insan az olğanına baqmadan, semetdeşlerimiz Meclis yolbaşçılarına çoqtan-çoq sualler bere ve siyasiy ceryan iştirakçileriniñ programması ve maqsadlarınen meraqlanalar.

İnsanlarnı çoqusı işnen teminlev, yaşayış şaraitlerini yaratuv, kommunal hızmetleri içün fiyatlarnıñ artması, balalarnıñ tasili, emekliler yaşınıñ artması kibi problemler raatsızlay. İnsanlar devletteki esas qanunlarnıñ adiy vatandaşlarğa nisbeten adaletsiz olğanına şikâyetleneler.