Meclis Prezidiumı bütün saylavcılarnı oktâbr 28 künü rey berüvde iştirak etmege ve «Batkіvşçina» birleşken muhalifetke qoltutmağa çağırdı

17 Oktâbr 2012

Bu aqta 2012 senesi oktâbr 17 künü keçirilgen “Qırımda saylavldı kampaniyasınıñ yekünleyici basqıçı – birleşken muhalifet bir mandatlı saylav dairelerinde bir namzet olaraq iştirak ete” mevzusında matbuat konferentsiyasında Qırımtatar halqı meclisi reisiniñ birinci muavini, Ukraina halq deputatlığına “Batkіvşçina” birleşken muhalifetten namzeti kösterilgen Refat Çubarov ayttı.

“Saylav ceryanınıñ yekünleyici basqıçı başlandı, – dep başladı çıqışını Refat Çubarov. – 11 künden soñ epimiz saylav noqtalarına barıp siyasiy partiyalarğa ve bir mandatlı dairelerdeki namzetlerge öz munasebetimizni kösterecekmiz”.

Refat Çubarov 2012 senesi oktâbr 13-te Meclisniñ Prezidiumı alğan qarar ve beyanat aqqında bildirip, onda Qırımtatar halqı Qurultayınıñ № 2, № 3 ve № 10 bir mandatlı saylav dairelerinde kösterilecek namzetler kelişilmesi aqqındaki qararlarına esaslanaraq iş tutqan Meclisniñ pozitsiyası başta siyasiy ortaqlar tarafından diqqatqa alınmağanı, soñra 2012 senesi oktâbr 15 künü keçirilgen qurultayda esapqa alınğanını bildirdi.

Çubarovnıñ aytqanına köre Meclis Prezidiumı Birleşken muhalifetniñ №10 saylav dairesinde Ahtem Çiygozniñ namzetine qoltutmağa azırlığını diqqatqa alaraq, №2 saylav dairesi boyunca namzetini köstergen Nariman Celâlovğa öz namzetini qaytarıp almaq ve saylavlardan çıqmaqnı tevsiye etti.
“Saylav ceryanı ve saylavaldı kampaniyası, siyasiy ortaqlarımıznen añlaşmalar devamında biz bir qararğa keldik ve oktâbr 13 künü Qırımtatar halqı Meclisiniñ Prezidiumı toplanıp, Nariman Celâlovğa saylavdan çıqmasını tevsiye etmek qararını aldıq. Öz nevbetinde birleşken muhalifet №10 saylav dairesinde namzeti kösterilgen Leonid Pilunskiyge de böyle tevsiyede bulunğan. Bugün şunı ayta bilemiz ki, Pilunskiy ve Celâlov tevsiyelerge seslenerek, Merkeziy saylav komissiyasına ait arizalarnı berdiler, – dedi Refat Çubarov.

Meclis reisiniñ birinci muavini jurnalistlerniñ diqqatını şuña celp etti ki, Meclis saylavaldı ceryanında saylavcılarnı Nariman Celâlov ve Ahtem Çiygoz namzetlerine qoltumağa çağırğanlarından maqsad №2 ve №10 dairelerde Birleşken muhalifet tarafdarlarını daa ziyade birleştirmek edi. Lâkin, Refat Çubarovnıñ aytqanına köre “qoşumca añlaşamlar neticesinde biz Nariman Celâlovnıñ saylavdan çıqmasına razılıq berirkenmiz, qalğan vaqıt içinde bizge öz saylavcılarımız arasında büyük añlatuv işlerini alıp barmaq kerek olacağını da añlaymız”. Refat Çubarov 16 oktâbr künü Merkeziy saylav komissiyasınıñ qararı boyunca Pilunskiy Leonid ve Nariman Celâlov ait dairelerde cedvelden çıqarılğanlarını tasdiqladı. “Şunı da aytmaq isteyim ki, saylavaldı areketler ketişatınıñ talili köstere ki Ahtem Çiygozniñ ğalebege şansları bar”, – dedi R. Çubarov.

№ 2 saylav dairesine kelgende ise, Refat Çubarovnıñ fikrince vaziyet biraz mürekkepçe. Çünki Sidorova Abibe Qırımtatar halqı Meclisinen kelişmegeni, bu dairege kirgen yerli ve regional meclislernen bu meseleni muzakere etmegeni alda namzetini kösterdi. Bu vaziyetni tüzetmek ve saylavcılarnıñ reylerini qazanmaq içün Abiba Sidorovağa bayağı çalışmaq kerek olacaq.
Jurnalistlerniñ Ahtem Çiygozniñ şansları aqqında suallerine cevap bererek Refat Çubarov böyle dedi: “Şunı tam ayta bilem ki, №10 saylav dairesinde Ahtem Çiygoz ğalebeni teminleyebilecek qadar rey alabilir. Çünki akimiyetniñ bu daireden saylavğa ketken namzeti küçsizdir. Bizim vazifemiz – alınğan reylerni qorçalamaqtır”.

Aynı zamanda Refat Çubarovnıñ fikrince qırımlı siyasetşınaslarnıñ tahminleri, “Qırım muhalifleri Meclisnen añlaşıp olamadı”, saylavda reyler taraf-taraf darqalacığı aqqındaki sözlerine baqmadan Meclis ve onıñ ittifaqdaşları bir qararğa keldiler. “Bu daa bir kere şundan delâlet bere ki, printsipial vazifeleri ve maqsadları bir olğan siyasiy küçler daima añlaşabilirler”, dep qayd etti R. Çubarov.