Meclis ofisini Romaniyadan kelgen qırımtatar delegatsiyası ziyaret etti

15 Noyabr 2012

Noyabr 15 künü Qırım müendislik-pedagogika universitetiniñ qırımtatar ve türk edebiyatı kafedrasında “Romaniya ve Qırım – özara işbirlik istiqballeri” mevzusında Romaniya ve Qırım işbirliginiñ meseleleri boyunca tögerek masadan soñ Romaniya delegatsiyası Meclis ofisini ziyaret etip, Meclis azalarınen körüşti.

Körüşüvde Romaniya Qırımtatar birleşmesi reisiniñ birinci yardımcısı Samir Menan, Buharest universitetiniñ professorı, türkşınas filolog Aciemin Bavbek, “Qaradeñiz” gazetasınıñ esasçısı, professor Cenan Bolat, Köstence şeerindeki Övidius universitetiniñ professorı, sanatşınas İbram Nureddin, Qırımtatarlar birleşmesi Mecidiye şeeri idaresiniñ reisi Şenol Murat, bunıñ kibi de Milliy Meclis azaları Ali Hamzin, Zair Smedlâyev, Şevket Qaybullayev, Zecet Qurtümerov, ve Qırımtatar halqı qurultayı teftiş komissiyasınıñ reisi Qurtseit Abdullayev iştirak ettiler.

Romaniya delegatsiyası Qırımğa seferleriniñ maqsadları, cümleden qırımtatar tiliniñ latin urufatına keçüv meselelerni ögrenmek, aqqında ayttı. Taraflar bunıñ kibi de qırımtatarlarnıñ Dobruca ve Qırımda inkişafı meselelerini de muzakere ettiler.