Qırımtatar Milliy Meclisi, Meclisniñ başınen beraber 33 insandan ibaret ola.

1991-2014 ss. Meclisniñ baş maqsadı qırımtatarlarğa qarşı şura rejiminiñ yapqanı genotsidniñ neticelerini yoq etmek, qırımtatar halqınıñ milliy ve siyasiy aqlarını yañıdan tiklemek ve onıñ serbest öz milliy toprağında milliy-devlet özüni tanıma aqqını yerine ketirmek edi.

2013 s. oktâbr ayında Qurultayda Meclisniñ şimdiki terkibi saylandı. 2013 s. noyabr ayınıñ 1-inde Bağçasaraydaki Han sarayınıñ baş meydanında Meclisniñ yañı azaları ve Başınıñ vekâletiniñ elde etilmesinen bağlı tantanalı bir tedbir keçirildi.

Rusiye 2014 s. Qırımnı işğal etken soñ Meclisniñ başı Refat Çubarov ve qırımtatr halqınıñ lideri Mustafa Cemilevniñ Qırım yarımadasına kirişi yasaq etildi, daa soñ işğalci bir akimiyet Meclisniñ Başınıñ muavinlerine qarşı cinaiy davalar açtı, Meclisniñ azaları ise muntazam basımğa oğradılar, temsilcilik organı ise yasaq etildi. Buña cevap olaraq BMTnıñ Halqara mekemesi bir qarar qabul etti ki, Rusiye qırımtatarlarnıñ temsilcilik müessiseleri, bu cümleden Meclis, aqqını temin etmege borclu, faqat Rusiye bu qararnı körmemezlikke ura ve müessiselerniñ vekillerine ve umumen qırımtatar halqına qarşı repressiyalarını devam ete.

2014 senesinden Qırımtatar Milliy Meclisiniñ reberligi Kıyivde buluna, milliy ve halqara seviyelerde Qırımnıñ ve qırımtatarlarnıñ menfaatını, özüni tanıma aqqını qorçalay, Qırımnı işğalden aza etüv meseleleri çezmege, qırım siyasiy esirlerini ve qorantalarını destek etmege, qırımtatar medeniyetini inkişaf etmege ve qırımtatar tilini saqlana çalışa.