Marlen Cerbinov Ukrayina mustaqilligi içün Cenk veteranları şurasına saylandı

16.07.2026

Qırımtatar Milliy Meclisi tarafından Ukrayina Veteranlar işleri nazirligi yanındaki Ukrayina mustaqilligi içün Cenk veteranları şurasına yollanılğan polkovnik, cenk areketleri iştirakçisi Marlen Cerbinov, Şurağa alternativ rey berüv neticesinde saylandı.

Marlen Cerbinov – ihtisasiy uquqçı, arbiy hızmetçi ve cenk areketleri iştirakçisi. Cenk veteranları şurasınıñ erkânında o, Rusiye-Ukrayina cenki iştirakçileri ve veteranları – vaqtınca işğal etilgen Qırım sakinleriniñ aq-uquqlarını ve menfaatlarını temsil etecek.

Qırımtatar Milliy Meclisi Marlen Cerbinovnı saylavınen hayırlay ve Ukrayina qorçalayıcıları içün semereli çalışmasını tiley. Cerbinovnıñ saylavını izaatlap, Qırımtatar Milliy Meclisiniñ Reisi Refat Çubarov, Marlen Cerbinovnıñ namzetligini öz reylerinen desteklegen cenk iştirakçileri ve cenk veteranlarına ayrı teşekkür bildirdi.

Yaşasın Qırım!
Ukrayinağa şan-şerefler olsun!